Pieldeatun.org: nova comunidade participativa para loitar contra o cambio climático
xoves, 4 de abril do 2019
A
loita contra o cambio climático ten na Rede unha nova comunidade
valedora: a comunidade de Pieldeatun.org,
unha fronte participativa e activista que conta co apoio de
organizacións e entidades senlleiras do ámbito medio-ambiental: a
Fundación Biodiversidade, o Ministerio de Transición Ecolóxica ou
The Climate Reality Project da Fundación Al Gore, amais de centros
de investigación e comunidades como Blockchain España, CEI-Mar, a
iniciativa One Oak – Bring Wood to Life ou a Universidade de Cádiz.
Precisamente será nesta última cidade, entre o 2 e o 5 de maio,
onde o movemento Piel de Atún colla corpo
visíbel para concienciar á cidadanía sobre a importancia de
combater o cambio climático.
Piel
de Atún é un movemento de sustentabilidade colaborativo e
integrador que xorde co obxectivo de unir persoas e institucións na
difusión do coñecemento e concienciación sobre o quecemento da
Terra.
A
devandita web informa sobre vindeiros encontros, sobre noticias
relacionadas co colectivo medio-ambiental, sobre o propio movemento e
seus apoios e, tamén, sobre os xeitos (rápidos e doados) de
participar directamente na fronte común. Tamén se achegan canles
propias de Instagram
e de Twitter.
Este
movemento nado en España pretende converter a cidadáns globais,
empresas e institucións en axentes do cambio, “contribuíndo así
na consecución dos Obxectivos do Desenvolvemento Sustentábel da ONU
fixados para o ano 2030”.
A
comunidade, co fin de conseguir o máximo número de apoios,
acompañou a súa presentación oficial en sociedade do seguinte
dato: “A contaminación dos océanos, a desertificación, a perda
de biodiversidade e a escaseza de auga potábel son factores que
causan un total de 12,6 millóns de mortes ao ano, segundo os datos
da OMS”. Asemade, Piel de Atún pon o foco na protección
dos mares e dos océanos e do uso masivo dos plásticos: “Os mares
están a ser os máis prexudicados polo cambio climático, xa que o
quecemento oceánico representa o 90% da enerxía acumulada, tal e
como expón o último Informe do IPCC”.
Luis
Prieto, fundador da comunidade, explica que a pel do atún é “un
gran indicador da saúde dos océanos, por iso pensamos que non hai
mellor nome para este movemento”. E engade: “Tras os últimos
datos presentados pola ONU, vemos máis necesario que nunca
concienciar á sociedade da importancia de deixar o mundo mellor do
que o atopamos, por iso creamos un movemento aberto e democrático”.
O
movemento celebrará o seu primeiro summit en Cádiz, “punto
de unión entre o océano Atlántico e o Mar Mediterráneo”, os
días 2, 3, 4 e 5 de maio. Haberá música, arte, relatorios,
actividades gastronómicas e actividades para mellorar o medio
ambiente e a bioesfera, entre outras accións, todas co obxectivo “de
concienciar sobre o cambio climático, a vida nos mares e océanos e
difundir coñecemento sobre estes temas”
Os
cidadáns que queiran formar parte deste movemento poden facelo a
través da web https://pieldeatun.org/
na sección B-Atuna, onde quen se rexistre poderá propor medidas
concretas que loiten contra o cambio climático e reduzan a
contaminación de mares e océanos. A nova comunidade activista
realizará vindeiros summits en diferentes cidades españolas
e no ano 2020 dará o chimpo a nivel internacional.