Pepeescudo di adeus

Hai máis de tres anos Pepephone estreou a aplicación Pepeescudo, que pode descargarse de balde para Android e iOS, e permite identificar chamadas comerciais non desexadas e axuda a evitar calotes, coa vantaxe de que a aplicación podía beneficiar a usuarios doutras compañías de telefonía móbil.
Pero agora que Pepephone está a integrar esta tecnoloxía a nivel de liña, é innecesaria a instalación dunha aplicación adicional, polo que decidiron que Pepeescudo deixe de estar dispoñible a partir do 21 de decembro, o que só terá un impacto real nos usuarios da aplicación que non fosen clientes de Pepephone.
Lembremos que o servizo de Pepeescudo estaba subministrado por Hiya, compañía que achega esta mesma función a varios fabricantes de móbiles (principalmente Samsung e Google), polo que os usuarios destas marcas tampouco terán problema para combater as chamadas fraudulentas e molestas.