OwnFone permite personalizar os seus móbiles con letras en Braille

Hai un par de anos OwnFone destacou no Reino Unido coa comercialización de teléfonos moi básicos e personalizables, que resultarían ideais para xente maior ou para cativos, e que agora, grazas á tecnoloxía de impresión 3D, ofrecen unha agardada opción: a posibilidade de que os seus botóns presenten letras en Braille (ou texto ordinario en relevo) de xeito que os invidentes poden gozar dun terminal desenvolvido pensando neles.
O terminal de OwnFone para invidentes busca un deseño minimalista, e pode encargarse/personalizarse vía web. O seu prezo sería de 60 libras esterlinas (73,59 euros) e pretendería ser moi sinxelo, pois non podemos esquecer que actualmente é posible empregar smartphones por parte de usuarios con deficiencias visuais grazas a distintas tecnoloxías de accesibilidade que integran actualmente os dispositivos móbiles (entre os que Apple parece ser a compañía que leva a dianteira).