Os xornalistas e os enxeñeiros de Telecomunicación da nosa terra unen forzas
xoves, 15 de novembro do 2018
Un
acordo para impulsar conxuntamente a formación e o impulso
profesional dos colectivos galegos de xornalistas e de enxeñeiras e
enxeñeiros de Telecomunicación, poñendo o foco nos múltiples e
enriquecedores ámbitos onde unha profesión conflúe coa outra. Así
se podería definir o
acordo asinado hoxe entre o presidente da Asociación de Enxeñeiros
de Telecomunicación de Galicia (AETG), Julio Sánchez Agrelo, e o
decano do Colexio Profesional de Xornalistas de Galicia (CPXG),
Francisco X. González Sarria, un convenio marco de colaboración
para, nas súas palabras, “instrumentar e regular a súa
colaboración de cara ao interese común de ámbalas dúas
entidades”.
Segundo
engadiron, o convenio abrangue o desenvolvemento conxunto de
actividades e proxectos en beneficio de ambos colectivos, entre as
que se atoparían actividades formativas, eventos, publicacións,
traballos de investigación ou dossieres informativos sobre temáticas
de utilidade común.
O
obxectivo da AETG ao abeiro desta alianza profesional e doutras
análogas, xunto co Colexio Oficial de Enxeñeiros de
Telecomunicación de Galicia, é o de “promover a cooperación e a
colaboración para o desenvolvemento e a incorporación das novas
Tecnoloxías das Telecomunicacións e da Sociedade da Información en
diferentes ámbitos profesionais”.
Asemade,
o convenio asinado hoxe abéirase aos esforzos do Colexio de
Xornalistas por “estabelecer vías de colaboración con outros
colexios e organizacións profesionais, de cara a socializar as
problemáticas da profesión xornalística e defender os e as
comunicadoras buscando intereses compartidos e realizando accións en
común con outros colectivos profesionais”.
No
acto de sinatura, os dous representantes valoraron positivamente esta
iniciativa conscientes de que redundará, sinalaron, no beneficio dos
colectivos profesionais aos que representan e do conxunto da
cidadanía.