Os xigantes da música obrigan a Grooveshark e pechar e pedir desculpas
luns, 4 de maio do 2015
Non todos os servizos de
música en streaming son iguais. Segundo ten feito saber en
repetidas ocasións a gran industria discográfica, unha cousa é
Spotify, que paga por achegar cantidades inxentes de música aos
internautas, e outra ben diferente é Grooveshark. Porén, as
diferenzas son sutís e non se ven a simple vista, polo menos os
usuarios non somos quen de velas así como así. Pero, en que se
distinguen? Pois no devandito: Spotify cumpre coa industria e os
artistas, e o Grooveshark non. O primeiro ten modalidades de pago e
de balde con publicidade, e o segundo non tanto. Consecuencia de todo
isto: Spotify segue para adiante, cos seus problemas e as súas
cousas, e
Grooveshark... simplemente pechou a porta. Ou mellor dito:
pecháronlla.
Segundo fan saber os
medios estes días, os responsábeis do servizo libre de música en
streaming víronse obrigados a asinar cun acordo cos xigantes
da música debido ás presións exercidas polo sector, empresas entre
as que se contan Sony Music, Warner ou Universal. As presións ían
dirixidas a rematar co cese de emisións. Esta situación de tirapuxa
perpetuouse durante certo tempo, pero finalmente a balanza rematou
por inclinarse ao favor das empresas. Neste intre, que queda de
Grooveshark logo da batalla? Pois
un comunicado de despedida do equipo responsábel, que agradecen
a confianza depositada nel e o compromiso dos usuarios a prol da
música e a cultura libre (libre no sentido de gratuíta e accesíbel
ao cen por cen). No comunicado tamén se admite parte da culpa no que
atinxe á actual situación de peche, se cadra como condición
indirecta estipulada polos xigantes do sector para que o tema non
fose a máis e ficara como estaba.
Segundo o acordo asinado
entre as partes en litixio, Grooveshark accede ao cesamento de todas
as súas actividades pechando de contado a súa páxina web, limpando
os seus servidores de toda a música destas empresas discográficas,
e entregando a súa web, as aplicacións móbiles e calquera outro
contido do que teñan a propiedade intelectual. Pola súa parte, a
Asociación de Industria Discográfica de Estados Unidos (RIAA)
pendurou un comunicado de seu, na súa páxina web, no que ve este
peche como “un trunfo para toda a industria musical”. Ao seu
xuízo, Grooveshark obtivo beneficio durante unha década e sen
compensar aos artistas e compositores de ningunha maneira pola achega
libre das súas cancións.