Os subscritores de Game Pass Ultimate poden gozar de EA Play en PC

A chegada de xogos de ZeniMax/Bethesda a Games Pass e da función FPS Boost para mellorar o rendemento de varios xogos de xeracións anteriores non é a última grande novidade para subscritores do servizo de subscrición de Xbox Game Pass Ultimate, que xa viñan gozando do servizo EA Play sen custo adicional na súa consola, e que a partir de hoxe ás dez da noite amplíase o beneficio tamén a PC.
Deste xeito, os subscritores de Xbox Games Pass Ultimate poden gozar no seu ordenador con Windows 10 de máis de 60 xogos de Electronic Arts, entre os que están títulos como Star Wars Jedi: Fall Order, FIFA 20, Titanfall 2, Need for Speed Heat, Battlefield, Command & Conquer, Los Sims e, como grande novidade, o recente Star Wars: Squadrons (que poderá xogarse en PC e consola).
EA Play tamén achega ofertas e promocións, así como o feito de poder probar xogos recentes como FIFA 21 ata 10 horas para así poder decidir se interesa a súa compra.
Para poder gozar dos xogos de EA Play baixo Windows 10 é preciso instalar a aplicación de EA Desktop, actualmente dispoñible en beta aberta e que pode coexistir no mesmo equipo con Origin, a tenda de xogos descargables de EA.