Os socialistas de Lugo únense á campaña #LugoPatrimonioMundial
luns, 7 de outubro do 2019
Os
socialistas de Lugo veñen de sumar o seu apoio oficial á
candidatura do casco histórico de Lugo como Patrimonio da
Humanidade, unha iniciativa que está a coller corpo nas redes
sociais a través do cancelo #LugoPatrimonioMundial. Na adhesión
formalizada hoxe participaron a deputada autonómica Patricia Otero,
os candidatos ao Congreso e o Senado pola provincia, Ana Prieto e
César Mogo, así como o secretario de Organización do PSdeG-PSOE,
Jose Antonio Quiroga.
Segundo
lembraron, a través desta proposta, co-impulsada pola alcaldesa Lara
Méndez, quérese acadar o cuarto recoñecemento mundial para a
cidade, logo das distincións recibidas pola Muralla, a Catedral e o
Camiño Primitivo, todos estes elementos Patrimonio da Humanidade. O
que se procura agora é lograr o mesmo selo para o casco urbano
amurallado.
Como
lembra o grupo socialista, o outro gran impulsor desta iniciativa foi
o guía turístico Guido Álvarez (@guidoalvarezp),
promotor nas redes da etiqueta-campaña #LugoPatrimonioMundial, que
xa recibiu o apoio de deportistas, artistas e políticos a todos os
niveis, e que contou cunha ampla repercusión nos medios de
comunicación (por exemplo o comunicador local Martín Barreiro, a
cantante Lucía Pérez, o ex-alcalde de Donostia Odón Elorza, o
ex-rexedor lucense José López Orozco ou entidades como o Club
Breogán). A iniciativa foi posta en marcha por Guido Álvarez en
febreiro deste mesmo ano. Coincidindo co lanzamento no Twitter, o
guía turístico recordou que a campaña dixital é un xeito, tamén,
de visualizar ante o mundo as “marabillas do noso centro
histórico”.