Os socialistas de Lugo piden que os concellos da provincia poidan desenvolver a rede de telefonía móbil
luns, 28 de marzo do 2022
O
Grupo Socialista na Deputación de Lugo defenderá no vindeiro pleno
ordinario, que se celebra este martes día 29 de marzo, unha moción
para
reclamar á Xunta un plan para que os concellos pequenos poidan
desenvolver a rede de telefonía móbil. En concreto, demandan
“asumir o custo de levar a acometida eléctrica ás torres de
telefonía móbil nos municipios do rural ou ben desenvolver un plan
de axudas específicas para evitar o sobrecuste que estes traballos
supoñen para as arcas dos pequenos concellos da provincia de Lugo”.
Na
iniciativa ínstase ao Goberno galego “a que cumpra os obxectivos
fixados na Lei 3/2013 de Impulso e Ordenación das Infraestruturas de
Telecomunicacións de Galicia, e especialmente os relativos ao
desenvolvemento de infraestruturas de telecomunicación, garantía de
acceso para particulares e empresas, e eliminación da fenda dixital
no rural”. Neste senso, o grupo remítese ao plan autonómico de
mellora de telefonía rural para o período 2022-2023, no que se
incluían os obxectivos de optimizar o servizo en 290 entidades de
poboación, impulsando a cobertura que reciben 7.000 habitantes de 65
concellos galegos. A este respecto, os socialistas de Lugo din que
“despois de ler estes grandes titulares, comprobamos que a
realidade do investimento previsto revela a cativa aposta da Xunta
pola dixitalización do rural galego e lucense”. E engaden: “En
realidade o investimento total desta acción apenas acada os 4,3
millóns de euros, 3,7 deles procedentes de fondos públicos. Ou o
que é o mesmo, a Xunta vai dedicar só 15.000 euros á cobertura
telefónica de cada núcleo de poboación”. A xuízo, da
agrupación, “as contas evidencian que a Administración autonómica
é quen convida a este proxecto, pero a quen lle toca pagar é ós
concellos, coas súas limitacións orzamentarias. Porque serán os
concellos os encargados de atopar as parcelas para instalar as torres
de telefonía; serán os concellos os encargados de poñer as
parcelas á disposición da Xunta, cos seus correspondentes accesos;
e serán os concellos os que teñan que sufragar os gastos de levar a
acometida eléctrica a cada unha das torres”. O grupo lembra
ademais que “tendo en conta que as torres poden estar asentadas en
parcelas de titularidade privada, o custo total de cada torre, para
os concellos, pode rondar entre os 60.000 e os 90.000 euros”.