Os novos portátiles de Dell terán unha autonomía de ata 19 horas

mércores, 13 de agosto do 2008 Marcus Fernández

JPEG - 39.9 KB

Pese a que se agardaba que hoxe Dell presentase oficialmente os seus ultraportátiles de baixo custo, a compañía sorprendeu anunciando melloras nos seus portátiles das series Latitude e XPS, de xeito que estes últimos contarán coa posibilidade de integrar disco SSD de 128 Gb nos seus modelos de 15 e 13 polgadas por un prezo de 450 dólares, mentres que os equipos Latitude teñen unha serie de melloras que serán moi ben recibidas, como a incorporación (opcional) da retroiluminación no seu teclado (o que permite a súa lectura en contornos escuros), unhas teclas máis separadas (e cómodas), a funcionalidade USB PowerShare (que permite cargar dispositivos por USB aínda que o ordenador estea apagado) e, moi especialmente, a mellora da autonomía dos portátiles, que poden mercar con baterías de ata 9 celas (incluíndo por defecto baterías de 6) que no modelo Dell Latitude E6400 con pantalla de 14,1 polgadas podería chegar a durar 19 horas. Amais, as novas baterías empregan a tecnoloxía ExpressCharge que permite completar o 80% da súa carga en só 1 hora.
Estes novos del Latitude da serie E, aínda que conten con modelos con pantalla de 12,1 polgadas e peso de preto de 1 quilo, non serían os agardados ultraportátiles de baixo custo, pois continuarían a ser equipos de gama media, mentres que o mencionado E6400 sería incluso de gama alta (o modelo básico custará 2.399 dólares en EE.UU.).

PUBLICIDADE