Os máis pequechos xa poden ver nos móbiles os seus debuxos favoritos grazas á app Xabarín TVG
luns, 5 de decembro do 2016
A Corporación da Radio e Televisión de Galicia
(CRTVG) lanzou a semana pasada unha nova aplicación, Xabarín TVG,
unha ferramenta que (como indica o seu propio nome) vai dirixida aos
máis pequenos da casa e, máis en detalle, a facer posíbel que
vexan os seus contidos favoritos (os de Xabarín Club) en teléfonos
móbiles e máis tabletas. A
ferramenta foi dada a coñecer na presentación da nova entrega de
Culturgal en Pontevedra, por parte da directora da Televisión de
Galicia, Rosa Vilas.
Segundo fixo saber, a iniciativa é unha
adaptación do Xabarín Club aos novos xeitos de ver contidos por
parte dunha xeración, a das nosas nenas e nenos, que é
“completamente dixital”. Tamén salientou que se trata da única
aplicación para a rapazada con series e programas de debuxos
“exclusivamente” en lingua galega. Series tan salientábeis como
por exemplo Os Bolechas, Fish and Chips, Cocorico, Caracois, A
tropa de trapo, A vaca Connie ou Raa Raa.
A ferramenta móbil, dispoñíbel para Android e iOS,
ofrécenos a posibilidade de seleccionarmos os contidos en función
da idade das nenas e nenos ou das preferencias que como pais
consideremos axeitadas. Ademais, permite ver os debuxos en streaming
Wi-Fi e 3G, e é compatíbel con Air Play/Apple TV. A idea é
que os máis pequenos poidan visualizar “os seus debuxos favoritos
en calquera lugar e a calquera hora do día. Xabarín TVG é a quinta
aplicación para dispositivos móbiles lanzada pola Televisión de
Galicia.