Os influentes poderían ter protección legal ante o acoso da prensa rosa

Kiko Hernández terá que pagar 30.000 euros por declaracións sobre Juls Janeiro

As celebridades da Internet podería quedar libres do acoso da prensa rosa se atendemos a unha sentenza xudicial que condena a Mediaset a pagar 192.000 euros por intromisión ilexítima na hora de Julia Juls Janeiro, filla maior de Jesulín de Ubrique a María José Campanario, quen tras cumprir 18 anos converteuse en obxectivo de programas como Socialité e Sálvame, empregando como fonte de moitas das informacións a súa conta de Instagram. O colaborador Kiko Hernández tamén terá que pagar outros 30.000 euros polas declaracións realizadas en dous programas de Sálvame.
A sentenza emitida polo Xulgado de Instrución nº 2 de Arcos de la Frontera (Cádiz), ante a que aínda cabe recurso, recolle que Mediaset incorreu nun «delito de intromisión ilexítima no dereito á honra, a intimidade persoal e familiar e á propia imaxe» de Julia Janeiro. Aínda que este tipo de sentenzas condenatorias contra o programa Sálvame non son ningunha novidade, nesta ocasión xogan un rol importante as redes sociais, xa que a sentenza entende que o feito de que a creadora de contido teñan 228 mil seareiros en Instagram non a converte nun personaxe público, e o feito de que Telecinco replique as imaxes que Janeiro publica sen contar coa súa autorización sería ilegal atendendo á xurisprudencia establecida polo Tribunal Supremo que entende que «a finalidade dunha conta nunha rede social na Internet é a comunicación do seu titular con terceiros, e non publicar a imaxe do titular da conta nun medio de comunicación».
Outro detalle da sentenza é que se indica claramente que «ser personaxe público non se herda», e o feito de que Julia Janeiro rexeitase dar entrevistas e falar cos medios deixa claro que non quere tal nivel de exposición. As publicacións que realiza en Instagram non autorizan a un programa de televisión a coller eses contidos sen consentimento e aproveitalos para expor publicamente a súa vida.
O que podemos entender desta sentenza é que o feito de que os influentes de Internet sexa coñecidos polos contidos que crean non abren a porta a que a prensa rosa poida entremeterse na súa intimidade. Loxicamente, se unha destas celebridades tivese desvelado detalles da súa vida privada en medios de comunicación xa non podería logo invocar o dereito á intimidade, pero no caso da inmensa maioría de creadores de contido parece claro que existe unha protección legal da que moitos tirarán proveito a partir de agora para evitar o acoso mediático.