Os enxeñeiros técnicos de telecomunicacións reivindican o seu importante papel durante a pandemia
luns, 5 de xullo do 2021
O Hotel Balneario Arnoia Caldaria acolleu o pasado sábado o II ForoTelecos
Galicia, o primeiro evento formativo presencial que os enxeñeiros de
telecomunicacións celebran a nivel nacional tras a aparición da COVID-19, no
que mediron os avances, proxectos e expectativas do sector a través de xornadas
técnicas, premios de recoñecemento e presentacións.
A cita comezou cun evento formativo presencial que contou
con tres relatorios técnicos. O primeiro deles impartido polo secretario
técnico do COITT, Luís Miguel Chapinal, presentouse o anteproxecto de Lei
Xeral de Telecomunicacións. A continuación, Optare Solutions presentou un
relatorio sobre a 5G e tecnoloxías habilitadoras: evolución, aplicación e
ámbito social. O terceiro relatorio, a cargo de Televés, versou sobre o
Complemento de cobertura 5G no interior dos edificios.
Ao acto inaugural acudiu o decano do Colexio Estatal, o secretario
xeral de Planificación e Xestión do Espectro Radioeléctrico, Antonio
Fernández-Paniagua, os decanos dos diferentes Colexios de Telecomunicacións de
España e o alcalde de Arnoia, Rodrigo Fernández Aparicio.
Antes da entrega dos recoñecementos a entidades e
profesionais, o decano de COETTGA, José
Manuel Martínez, dirixiu unhas palabras para reivindicar a presenza e visibilización dos enxeñeiros técnicos en
telecomunicacións naquelas esferas públicas que teñen que adaptarse á
dixitalización e novas tecnoloxías, ademais da gran capacidade de traballo que
demostrou o colectivo durante a pandemia.
Así mesmo destacou a necesidade de novos talentos no campo
da enxeñería e a presenza da muller no sector xa que só representan o 25% das
persoas matriculadas nalgunha rama de enxeñería nas universidades.
Pola súa banda, o presidente do COITT, Mario Cortés, sinalou a calidade do
servizo de telecomunicacións que se mantivo durante toda a pandemia e que os
acontecementos fixeron que a profesión se puxese en boca da sociedade e os
medios de comunicación.
Premios Enxeño 2020. Recoñecementos a entidades e profesionais do ramo
A continuación, realizouse a entrega dos Premios Enxeño 2020, unha segunda edición de
galardóns que recoñece a traxectoria de profesionais e entidades no mundo das
Telecomunicacións:
— Premio Enxeño 2020 Empresa Líder no Sector para Optare
Solutions, recolleu o premio o seu CEO
Luís Álvarez Sestelo.
— Premio Enxeño 2020 Proxección e Crecemento a Fibralar, recolleu o premio o seu CEO, Rafael Fernández.
— Premio Enxeño 2020 pola Innovación e a Difusión das Tecnoloxías a CRTVG,
recolleu o premio a director da área de Innovación e Negocio, José Pereira.
— Premio Enxeño 2020 a Toda Unha Vida a Jorge Raúl Carollo Barral pola súa
gran traxectoria profesional coa súa participación en máis de 750 proxectos que constitúen un exemplo para todos os
enxeñeiros de telecomunicacións.
— Premio Enxeño 2020 Enxeñeiro do Ano pola súa gran actividade laboral e unha
traxectoria impecable a Carlos Balsa.
O acto clausurouse coa intervención do Subdirector Xeral de
Planificación e Xestión do Espectro Radioeléctrico, Antonio Fernández-Paniagua,
que felicitou ao sector polo seu extraordinario labor realizado durante a
pandemia e falou dos importantes retos que teñen por diante como son: unha nova
Lei Xeral de Telecomunicacións e unha Lei Xeral de Tecnoloxías 5G. Tamén
destacou o reto de expansión por todo o territorio nacional da banda larga,
incluídas as zonas rurais, antes de
2025.