Os chats de terceiros chegan a WhatsApp

WhatsApp prepara o lanzamento en Europa dunha das maiores novidades da súa historia recente: a posibilidade de enviar e recibir mensaxes desde aplicacións de terceiros que decidan interoperar coa plataforma. A medida responde ás obrigas marcadas pola Lei de Mercados Dixitais (DMA), que obriga ás grandes plataformas a permitir que os usuarios se comuniquen con servizos externos se así o queren.
A funcionalidade, bautizada como chats de terceiros, chega tras varios meses de probas a pequena escala e estrearase con dúas aplicacións que xa confirmaron a súa integración: BirdyChat e Haiket. Os usuarios de WhatsApp na rexión europea que decidan activar esta opción poderán intercambiar mensaxes, imaxes, notas de voz, vídeos e ficheiros cos contactos destas plataformas tanto en Android como en iOS. A creación de grupos mixtos quedará para máis adiante, cando os socios tecnolóxicos poidan soportar esta capacidade.
Meta subliña que o desenvolvemento da interoperabilidade mantén a prioridade na privacidade e na seguridade. Para cumprir coa DMA, as aplicacións que se conecten con WhatsApp deberán empregar un nivel de cifrado extremo a extremo equivalente ao do servizo principal (actualmente a funcionalidade só está dispoñible para BirdyChat, aplicación que non está dispoñible publicamente). A compañía afirma que leva máis de tres anos traballando con servizos europeos e coa Comisión Europea para deseñar unha solución que respecte estas garantías ao tempo que habilita unha experiencia sinxela para quen opte pola novidade.
A activación dos chats de terceiros é totalmente voluntaria. Nas vindeiras semanas, os usuarios comezarán a ver un aviso no apartado de configuración explicando como acceder á función e cales son as diferenzas entre as conversas tradicionais e as conversacións con aplicacións externas. A interoperabilidade estará dispoñible en toda a rexión europea, tal e como marca a normativa comunitaria.
Meta anunciou que continuará ampliando esta capacidade a novos socios e incorporando funcionalidades adicionais a medida que avance o despregue para cumprir cos requisitos da DMA.