Os artistas españois xeraron preto de 137 millóns de euros en dereitos durante 2024

Spotify fixo públicos os novos datos da súa iniciativa Loud & Clear sobre a economía do streaming musical en España, revelando un crecemento sostido tanto en ingresos como na proxección internacional dos artistas españois, como un xeito de mellorar a imaxe pública da compañía tras as críticas recibidas por parte de numerosos autores que non parecen conformes coas compensacións económicas recibidas.
Segundo a compañía sueca, só en 2024 os artistas españois xeraron case 137 millóns de euros en dereitos a través da plataforma, o que supón un aumento do 11 % respecto ao ano anterior e máis do dobre respecto a 2019. O informe destaca tamén que o número de artistas que superaron os 10.000, 50.000 e 100.000 euros en ingresos duplicouse desde 2019.
En termos globais, Spotify achegou á industria musical máis de 10.000 millóns de dólares en 2024, a maior cifra anual da historia do sector segundo a plataforma, situándose como o principal servizo en termos de achegas económicas para músicos e selos discográficos.
Outro aspecto salientable do informe é o peso crecente dos artistas independentes: máis do 60 % dos dereitos xerados polos artistas españois en Spotify en 2024 proceden de músicos ou selos independentes. Esta cifra sitúa a España por riba da media mundial, onde a proporción rolda o 50 %. Segundo datos de MIDiA, Spotify representa máis da metade dos ingresos por streaming para artistas independentes a nivel global.
A dimensión internacional da música tamén queda patente: máis do 50 % dos dereitos xerados por artistas españois proveñen de oíntes fóra do país. En total, hai preto de 850 millóns de listaxes de reprodución creadas por usuarios en todo o mundo que inclúen artistas do Estado, evidenciando o papel exportador da música en español.
Neste sentido, o español afírmase como un idioma clave dentro da plataforma. A música interpretada neste idioma rexistrou un crecemento do 16 % nos ingresos globais en 2024 respecto a 2023, e practicamente duplicou os rexistrados en 2021. Ademais, os artistas que superaron o millón de dólares en ingresos no último ano gravaron en 17 idiomas distintos, fronte aos 8 de 2017, confirmando o carácter crecente e multilingüe da industria musical no contexto dixital.