Os Smart TV de Samsung facilitarán o acceso aos contidos de Apple

luns, 7 de xaneiro do 2019 Marcus Fernández

As plataformas de contidos audiovisuais están intimamente ligadas cos grandes fabricantes de electrónica de consumo, xa que a súa integración elimina a fricción á hora da contratación dos seus servizos, e semella que dende Apple por fin foron conscientes de que non poden limitar as súas plataformas aos seus contidos, e así temos que Samsung anunciou hoxe que a primeiros da primavera comezará a ofrecer películas e series de televisión a través dos Smart TV que lance este ano, e que tanto integrarán a tenda de contidos iTunes como ofrecerán compatibilidade con AirPlay 2.
A nova prestación dos televisores de Samsung chegará a través dunha actualización do seu firmware, chegando en primicia aos Smart TV de Samsung en máis dun cento de países, mentres que o AirPlay 2 está previsto que chegue a máis de 190 países.
A aplicación de iTunes para televisores de Samsung permitirá acceder ao catálogo de contidos ofrecido por Apple, con milleiros de películas e series, incluíndo contidos en ultra alta definición con HDR, e eses contidos integraranse coas funcións dos Smart TV de Samsung como a guía universal de contidos, o buscador e o asistente de voz, ofrecendo así unha experiencia de uso coherente.
A compatibilidade con AirPlay 2 facilitará a reprodución de fotografías, vídeos, música, podcast e outros contidos dende dispositivos de Apple directamente no televisor, incluíndo os televisores QLED 4K/8K, The Frame e Serif lifestyle, así como o resto de modelos de Smart TV de Samsung.

PUBLICIDADE