Os Premios Prisma distinguen unha webserie e un podcast científicos e máis o proxecto Talentos Inclusivos

O xurado dos Premios Prisma Casa das Ciencias á Divulgación determinou o pasado 24 de setembro os proxectos gañadores da XXXV edición do certame. Entre os premiados atópanse varios proxectos tecnolóxicos e innovadores, como por exemplo unha serie web científica (Camiño a Congreso) ou un podcast que achega a investigación á rapazada (A lupa sónica). Ademais, o proxecto Talentos Inclusivos, promovido polo CITIC da UDC e ASPACE Coruña co obxectivo de romper barreiras sociais coas tecnoloxías máis avanzada, recibiu unha mención honorífica na categoría de proxecto singular.
Os premios Prismas son unha iniciativa do Concello da Coruña, a través dos Museos Científicos, que pretende potenciar a difusión da cultura científica en España, e apoiar a todos os/as profesionais que traballan neste eido.
Os traballos premiados nesta edición, xunto co proxecto Talentos Inclusivos, foron os seguintes:
– Mellor traballo en vídeo: Camiño a Congreso, unha webserie do IAA-CSIC, por unha ficción audiovisual de gran calidade técnica que retrata con humor o labor cotián nun equipo científico.
– Mellor novo medio: Yonki Books, de Oihan Iturbide, por achegar recursos de gran calidade, con riqueza de formatos e perspectivas, sobre as adicións, un problema rodeado de estigmas e prexuízos.
– Mellor libro editado: Acoso, de Ángela Bernardo Álvarez en Next Door Publishers, por presentar unha investigación rigorosa sobre o acoso, un problema de gran transcendencia que afecta os dereitos fundamentais das persoas que fan ciencia.
– Mellor artigo xornalístico: Historia dun secuestro xenético: así foi como unha mosca roubou “superpoderes” a unha planta, de Jesús Méndez González en Axencia SINC, por converter unha investigación de ciencia básica e moi pouco coñecida nunha historia fascinante de gran calidade xornalística.
– Mellor traballo en radio: A lupa sónica, un podcast de María Teresa Pérez Cidoncha e Xaviera Torres Joerges, por achega a ciencia á infancia cun estilo innovador e un deseño sonoro de gran calidade.
– Mellor proxecto singular: Dons de ciencia, promovido pola Universidade Politécnica de Valencia, por reivindicar a científicas contemporáneas nun proxecto de amplo alcance que combina arte e ciencia coa participación da cidadanía.
– Mención honorífica, na categoría libro editado, á Ciencia do chup chup, de Elena Sanz en Editorial Planeta.
A entrega dos premios será o sábado 19 de novembro na Coruña.