Os Bolechas percorrerán os festivais do verán convidándonos a reciclar aparellos electrónicos
luns, 10 de xuño do 2019
Os
refugallos eléctricos, electrónicos e informáticos (tamén
coñecidos como RAEE) e os mellores xeitos de garantirlles unha
correcto tratamento van ser o leit motiv da nova xira da
familia de Os Bolechas pola nosa terra, unha xira que xa comezou (en
Marín e na Coruña, coincidindo co Gran Premio Internacional Marcha
Cantóns) e que proseguirá os días vindeiros en Carballo (12 de
xuño), en Santiago (os días 13 e o 14 de xuño, con motivo do
festival O Son do Camiño)
e máis en Narón (o día 15).
Así
nolo conta a Consellería de Medio Ambiente, organizadora do periplo
lúdico-ambiental, un percorrido se fixo coincidir con algunhas das
festas e eventos máis senlleiros da tempada para acadar, desta
maneira, as máximas pegada e repercusión.
Entre
estas grandes citas inclúese tamén o
Resurrection Fest de Viveiro.
Ao
abeiro da xira, os acontecementos multitudinarios da tempada contará
coa presenza de postos informativos medio-ambientais, unha carpa
inchábel, pantallas táctiles con xogos interactivos e vídeos
divulgativos sobre as vantaxes de reciclar aparellos eléctricos e
electrónicos, comezando (o primeiro elo da cadea) por depositarmos
estes trebellos en desuso nos puntos limpos fixos ou móbiles ou nos
contedores específicos habilitados. Por suposto, a xira verase
complementada (e impulsada) coas contribucións in situ dos
integrantes da familia de Os Bolechas, os persoeiros creados por Pepe
Carreiro.
Esta
nova actuación enmárcase na campaña O que se enchufa,
recíclase, posta en marcha pola Consellería de Medio Ambiente
co obxectivo de “mellorar a xestión e o tratamento deste tipo de
refugallos pola vía da concienciación e da sensibilización
cidadá”. A actividade en cuestión desenvolverase ao longo de xuño
e xullo en dúas ducias de concellos. Será, en palabras da
consellería, “unha campaña de street marketing ou
mercadotecnia de rúa na que se contará tamén coa colaboración de
Os Bolechas, os protagonistas da popular serie de contos que se
ocuparán da parte de sensibilización dirixida ao público
infantil”.
Obxectivo:
máis información e mellor xestión
Os
obxectivos xerais desta nova iniciativa de carácter divulgativo son
“fomentar o coñecemento sobre as prácticas de consumo actuais e
como inciden na nosa contorna, contribuíndo para evitalo a un mellor
tratamento dos RAEE a través do incremento das actuais taxas de
recuperación”. Así mesmo, proxectarase a imaxe de Galicia como
“pioneira en sustentabilidade e educación ambiental desde a nenez,
como vía para contaxiar ao resto da sociedade dese mesmo impulso
sustentábel e ecolóxico”.