Olympe Emprende fomentará na nosa terra o emprendemento feminino, innovador e cooperativo
luns, 3 de outubro do 2022
O
Programa Olympe Emprende
prepara importantes avances para impulsar o talento innovador e
empresarial feminino da nosa terra. En concreto, trátase dun
programa liderado por Tandem Social, Abeluria e Wazo Coop destinado a
apoiar o emprendemento en feminino “con valores e principios de
economía social e solidaria en Galicia”. A fórmula é a formación
con perspectiva de xénero, o acompañamento individual e colectivo e
a conexión de experiencias emprendedoras a nivel local.
Olympe
Emprende seleccionará iniciativas de Galicia, en palabras das tres
entidades impulsoras “unha Comunidade con moito potencial na
economía social e no emprendemento en feminino”. O programa vai
dirixido a todas aquelas iniciativas emprendedoras de Galicia
lideradas por mulleres que “estean arraigadas no territorio, que
practiquen a intercooperación, garantan a democracia interna,
incorporen a economía e o coidado feminista nas súas prácticas,
promovan a diversidade na composición e participación e teñan en
conta o impacto ambiental da súa actividade”.
Ofrecerase
formación, capacitación tecnolóxica, acompañamento individual e
colectivo, webinarios, xiras de emprendemento,
sesións de intercooperación e a posibilidade de optar a un premio
económico ás mellores iniciativas que permita dar un soporte á
constitución de cooperativas no territorio lideradas por mulleres. O
programa realizarase de xaneiro a xuño (2023), e valorará que as
iniciativas teñan entre os seu obxectivos a consecución dun impacto
social (como por exemplo a mellora do benestar do ser humano e a
equidade social).
Pódense
presentar iniciativas colectivas que se atopen nunha fase inicial
(ideas de negocio que non se iniciasen e que se atopen nunha fase de
desenvolvemento mínima, sen necesidade de que se definise ningún
modelo de negocio).
Tandem
Social, Abeluria e Wazo Coop auspiciarán e formarán de xeito
virtual aqueles proxectos seleccionados explicando o concepto de
empresa da economía social e solidaria, os modelos de negocio, as
técnicas da nova mercadotecnia e, tamén, as fontes de financiamento
alternativas. Ao mesmo tempo levarase a cabo un acompañamento
individual e colectivo de xeito virtual dos proxectos para axudar nas
necesidades específicas de cada proxecto emprendedor.
Olympe
Emprende pretende honrar a memoria de Olympe de Gouges,
revolucionaria esquecida que, segundo lembran Tandem Social, Abeluria
e Wazo, defendeu a igualdade entre o home e a muller en todos os
aspectos da vida pública e privada e en 1791 redactou a Declaración
dos Dereitos da Muller e a Cidadán.