O sistema de xeolocalización de Satdata adxudicado no Concello de Cidade Real

venres, 24 de outubro do 2008 Raquel Noya

O Concello de Cidade Real vén de comunicar que os vehículos do seu servizo municipal de limpeza levan incorporado, dende hai un par de semanas, o sistema de xestión e localización galego Satdata, o que lle permite coñecer con exactitude a posición e a actividade diaria dos vehículos e levar así un “control exhaustivo e real” da limpeza da cidade.
O concelleiro de Sosteñibilidade da devandita cidade manchega, Juan Caballero, comentou perante os medios de comunicación que “este innovador sistema lle permite optimizar os recursos municipais e mellorar os servizos ofrecidos aos seus cidadáns” e engadiu que, aínda que Cidade Real é un núcleo urbano limpo, “todo o que se faga por melloralo estará ben empregado”.
O sistema de localización Satdata é unha solución de xestión e control de flotas desenvolvida integramente pola empresa galega de I+D+i Satdata Telecom e distribuída en Castela A Mancha pola empresa de Tornelloso Cantenet e que foi a gañadora dun concurso público convocado polo goberno local da dita cidade manchega coa finalidade de instalar unha solución destas características nos 19 vehículos que conforman o parque móbil da área de limpeza municipal.
Con Satdata, cada varredora ou equipo de auga leva instalado un dispositivo conectado ó centro de control situado no consistorio, ao que envía en tempo real as posicións exactas dos vehículos, o que permite ver a súa localización sobre un plano da cidade. O sistema, asemade, envía outros datos como a dirección, velocidade á que circula o vehículo, motores en funcionamento, temperaturas, alarmas…
A solución non só permite acceder a toda esta información en tempo real senón que ofrece a posibilidade de obter históricos dos traballos que desenvolven os distintos equipos, algo que valoran moi positivamente neste concello manchego.
A operación supuxo para o goberno local un importe global de 45.000 euros e os responsables non descartan a posibilidade de amplialo a outros servizos municipais.

PUBLICIDADE