O segundo programa e_Destrezas achega dez cursos de capacitación TIC para a comunidade universitaria viguesa
xoves, 17 de setembro do 2020
O programa de formación e_Destrezas volve este ano cun amplo feixe de actividades para fomentar as
competencias dixitais da comunidade universitaria da UVigo. A
iniciativa, impulsada pola Vicerreitoría de Captación de Alumnado,
o Consello Social da Universidade de Vigo e o Santander, virá tamén
marcada pola COVID-19, que impediu que o pasado se puidese impartir
parte do programa inicialmente previsto e que motivou un
fortalecemento da vertente online desta segunda convocatoria. Os
cursos, a desenvolver maioritariamente en liña, comezan en outubro a
través do Campus Remoto.
“Para esta edición, en base á experiencia do
primeiro ano, vanse duplicar as edicións (unha por cuadrimestre) dos
cursos que tiveron máis éxito (como Office, Excel ou Matlab),
manter aqueles que tiveron boa acollida e eliminar os que non tiveron
a resposta esperada e que foron substituídos por outras propostas
que xurdiron ao longo do curso pasado”, explica Nacho Armesto,
director da Área de Extensión Universitaria, que tamén confirma
que algúns dos cursos que non se chegaron a facer por mor da COVID
no último cuadrimestre, recuperaranse nesta segunda edición do
programa.
e_Destrezas iniciará a súa segunda edición o
vindeiro 1 de outubro co curso de Fundamentos de deseño gráfico
con Illlustrator e Photoshop, que se prolongará ata o vindeiro
19 de novembro. A axenda inclúe outras actividades de gran interese
como Iniciación ás bases de datos con Access e
Introdución a Raspberry Pi: de centro multimedia a domótica
persoal.
En total son dez os cursos programados para os vindeiros
meses, nos que a formación se desenvolverá de xeito presencial a
través do Campus Remoto e tamén, no caso dalgún deles, con horas
de formación non presenciais. “Dada a situación na que nos
atopamos, nesta segunda edición de e_Destrezas preferimos non
arriscar a cancelación de cursos e apostar pola docencia síncrona a
través de Campus Remoto. Algúns cursos incorporan horas de traballo
autónomo, asíncrono (tarefas que se fan fóra de tempo de clase),
xestionado mediante as plataformas Faitic e Moovi”, engade Armesto,
que tamén explica que no caso dos cursos máis prácticos decidiuse
manter un número mínimo de sesións presenciais, “pola súa
natureza máis práctica/física e que se desenvolverán no Campus de
Vigo en salas aínda por determinar”.Cara ao segundo cuadrimestre
está previsto continuar coa oferta formativa con cursos que xa se
impartiron na primeira edición do programa, así como outros novos,
centrados en cuestións como a edición de vídeo e son dixital para
web, Python ou deseño CAD con Autocad.