O sector turístico de Lugo coincide coa Deputación na necesidade de apostar polas TIC
mércores, 31 de maio do 2017
O
presidente da Deputación
de Lugo, Darío Campos Conde, xunto ao deputado de Turismo,
Eduardo Vidal Baamonde, amosaron este mércores os resultados das
mesas de traballo levadas a cabo en 2017 ao abeiro do Plan
Estratéxico de Turismo (2017-2020) da entidade provincial, que será
presentado este mes de xuño. Segundo fixeron saber, logo dunha
primeira fase de estudo do sector na provincia comezouse co plan de
participación sectorial que incluíu entrevistas en profundidade con
expertos, mesas de traballo e enquisas online. Este treito de
traballo, que convocou preto de 250 axentes de todos os eidos
turísticos, serviu entre outras cousas para pór de manifesto a
necesidade de avanzar en recursos dixitais de promoción,
comunicación e reclamo.
O
Presidente lembrou que “o plan de participación sectorial
deseñouse coa intención de realizar unha fase de consulta ao sector
para que así todos os axentes do territorio puideran participar no
deseño do Plan Estratéxico da Provincia de Lugo, xa que este plan
pretende ser feito entre todos e para todos”. O seu obxectivo,
recordou, é impulsar o medre e transformación do tecido turístico
da provincia cara a un modelo máis competitivo, innovador,
participativo e sustentábel.
Segundo
fixo saber, o que resta agora, antes da presentación do Plan, é
unha fase de diagnose e o establecemento dos retos e estratexias da
folla de ruta.
Polo que
respecta ás conclusións do plan de participación sectorial,
centráronse na situación actual do sector turístico na provincia
de Lugo, a identificación dos “recursos e produtos estrela”, as
posíbeis actuacións de promoción e comercialización, así como a
formación e profesionalización do sector.
En canto
ás actuacións de promoción e comercialización, todos os axentes
que participaron nas mesas de traballo e nas enquisas consideran que
é preciso e moi axeitado aplicar estratexias de promoción e
comercialización en liña e offline, que acubillarían, entre
outros recursos, unha páxina web turística da provincia, promoción
a través de redes sociais, aplicacións turísticas, asistencia ás
feiras turísticas e campañas publicitarias.
Tamén se
coincidiu en facer fincapé na formación e na profesionalización do
sector, debendo mellorar especialmente nos seguintes ámbitos:
idiomas, mercadotecnia turística e emprego de novas tecnoloxías da
información.