O proxecto de marketing turístico Pilgrim viaxará a Silico Valley grazas ao programa YUZZ
xoves, 23 de xuño do 2016
A startup tecnolóxica orientada á xestión e ao marketing turístico Pilgrim impulsada por
Roberto Fraga Martínez e Lara Castelo Otero foi elixida como a mellor idea do centro
YUZZ Universidade da Coruña e obtivo unha praza para viaxar a Silicon Valley xunto
aos outros 48 participantes máis brillantes da actual edición de YUZZ,
visitando empresas como Google, LinkedIn ou Facebook e asistindo a conferencias
en prestixiosas universidades como Berkeley ou Standford. Os 49 gañadores
visitarán tamén o Spain Tech Center (STC) -impulsado por Banco Santander, ICEX
e Red.es-, cuxa meta é facilitar a implantación de PEME de base tecnolóxica
española nun dos contornos máis dinámicos e competitivos do mundo, acelerando o
seu proceso de internacionalización.
O xurado seleccionou o proxecto de Roberto Fraga Martínez e Lara Castelo Otero
como o mellor do centro YUZZ Universidade da Coruña, espazo en que desde hai cinco
meses 13 estudantes traballan no desenvolvemento das súas ideas empresariais co
apoio da Universidade da Coruña, que tivo como coordinador local a José
Sanjurjo, adxunto de Participación na Vicerreitoría de Estudantes,
Participación e Extensión Universitaria.
Pilgrim é unha suite tecnolóxica enfocada á xestión e ao marketing turístico. Na súa fase inicial está orientado cara o
Camiño de Santiago, coa intención de permitir a súa escalabilidade a calquera
ámbito do sector turístico. Integra tecnoloxías móbiles e sistemas de
conectividade por proximidade, como os balizas sen fíos ou o NFC. Coa
integración desta tecnoloxía e o desenvolvemento de aplicacións móbiles os
establecementos chegan ao seu consumidor final a través de publicidade
totalmente segmentada, enviada de forma eficiente e coa posibilidade de
analítica e medición sobre todas as campañas e impactos. Ademais, o propio
cliente poderá aproveitarse de promocións en tempo e ubicación real, saber a
dispoñibilidade de prazas hoteleiras, das diferentes ofertas gastronómicas,
diferentes eventos, consultar a información sobre os puntos de interese
turístico, cultural ou social, realizar reservas de calquera tipo e mesmo
realizar pagos sen necesidade algunha de levar diñeiro. Así mesmo, fai unha
aposta pola realidade aumentada e os elementos interactivos como ferramenta de
dinamización.
Por outras banda, 21Nexos, un
proxecto de consultaría histórica creado por Balbina Gándara Antelo foi
seleccionado como finalista para o premio YUZZ Mujer (patrocinado pola
Fundación EY) e optará a 20.000 euros, mentres que Pilgrim, resultou finalista
tamén para YUZZ Fintec (iniciativa da Área Corporativa de Innovación de Banco
Santander) e poderá optar a catro meses de aceleración da súa idea nos espazos
de innovación da Ciudad Grupo Santander.