O proxecto Smartiago colle impulso co proceso de licitación da súa oficina técnica
luns, 16 de xullo do 2018
O
Concello
de Compostela iniciou a semana pasada o proceso de licitación da
oficina técnica do proxecto Smartiago, a iniciativa local de
cidade intelixente, posta en marcha para transformar a capital galega
nunha urbe máis sustentábel e optimizada e mellor comunicada e
xestionada. O alcalde Martiño Noriega informou dos detalles do
contrato de licitación, que será de 565.000 euros, IVE incluído.
Desa cantidade, o 80% procederá de fondos europeos FEDER.
Tamén
lembrou que o proxecto aséntase nas prácticas de compra pública
innovadora, que o Concello ten captados cinco millóns de euros para
o programa (en virtude do convenio asinado co Ministerio de Economía)
e que a Administración compostelá foi “a primeira do Estado en
asinar un convenio co Ministerio de Economía para a captación de
fondos europeos FEDER destinados ao fomento da compra pública
innovadora, no período 2014-2020”.
Noriega
engadiu que a primeira fase de Smartiago conta cun orzamento de case
6,2 millóns de euros, dos que 5 millóns proceden de fondos
europeos, e unha duración estimada de catro anos. Nese prazo,
“procuraranse o desenvolvemento de solucións innovadoras para as
tres liñas estratéxicas definidas no programa”, apuntou, facendo
un repaso por estas tres liñas: “A da xestión sustentábel e
intelixente dos residuos sólidos urbanos, a da mobilidade
intelixente sustentábel, e a do alumeado ornamental intelixente para
a conservación do patrimonio”.
A
segunda fase comezará coa implantación nos servizos municipais
destas solucións, unha vez achadas. Este treito do camiño
abordarase “integramente” con fondos propios. “Desta maneira”,
manifestou, “o Concello converteríase no primeiro cliente dos
investigadores que dean con esas solucións innovadoras, pero tamén
sería socio parceiro que cobraría royalties no caso de que
esas novas tecnoloxías foran contratadas por outras
administracións”.
A
oficina técnica do Smartiago contará cun orzamento de 565.000 euros
ata o ano 2021. Desa cantidade, 452.000 procederá de fondos europeos
FEDER e 113.000 serán achegados polo Concello de fondos propios. A
súa creación estaba recollida no convenio asinado co Ministerio de
Economía para desenvolver o programa.