O programa de solidariedade TIC da USC entrega os diplomas aos seus participantes
xoves, 10 de abril do 2014
Era no
mes de novembro cando botaba a andar o proxecto Abrimos
unha fiestra ao mundo para TI(C), unha
idea solidaria que quere afondar no compromiso e na responsabilidade
social da Universidade de Santiago de Compostela (USC), contribuíndo
a ampliar a oferta formativa dun colectivo en risco de exclusión
social -as persoas con discapacidade intelectual- co fin de mellorar
o seu grao de empregabilidade e evitar que permanezan illadas da
sociedade da información. O
proxecto culminou esta semana coa entrega de 9 diplomas a persoas con
diversidade cognitiva de Lugo.
Cómpre
dicir que esta é unha iniciativa que se axusta ás pretensións que
propiciaron a creación da da Aula
TIC-PEME da USC emprazada no campus da Cidade da Muralla e que
conta con financiamento da Fundación La Caixa, os seus obxectivos
son a activación de propostas e proxectos de formación e
asesoramento de capital humano asociado ás TIC, o traballo na
formación continua ao longo da vida laboral a través da xeración
de ofertas específicas que favorezan o acceso aos recursos e medios
máis novos no eido das TIC.
O proxecto da Aula
TIC-PEME da USC seleccionaba a universitarios/as voluntarios/as
interesados/as en participar, completando estes un programa de
formación específico no que adquiriron as habilidades e
competencias precisas para desenvolver este programa de
alfabetización informática de persoas con diversidades cognitivas,
funcionais ou motrices. Logo deste proceso de formación, o grupo de
voluntarias universitarias achegou (a xeito de titoras) a outras
tantas persoas coas ditas características ao mundo das TIC nas
distintas sesións presenciais desenvolvidas todos os mércores dos
meses de febreiro e marzo nunha das aulas de informática da
Facultade de Administración e Dirección de Empresas de Lugo.
O proxecto Abrimos
unha fiestra ao mundo para TI(C) culminaba esta semana coa
entrega de diplomas a 9 persoas con discapacidade intelectual e
residentes no centro San Vicente de Paúl de Lugo que durante oito
semanas recibiron formación en materia TIC e ampliaron o seu
coñecemento sobre o uso de distintas aplicacións de ofimática e
Internet (Internet, correo, chat, word, excel, ppt, retoque
fotográfico...). Ao acto de entrega -que tiña
lugar na Facultade de Administración e Dirección de Empresas de
Lugo- asistían: o vicerreitor de Coordinación e Planificación do
campus de Lugo, Pedro García Herradón; a coordinadora da Aula
TIC-PEME da USC, Ángeles López Cabarcos; José María Vázquez, en
representación de CaixaBank, e sor Alicia, do centro lugués San
Vicente de Paúl.