O potencial da computación na seguridade e na defensa, ao detalle o mes vindeiro na FIC

O 15 e 16 de decembro celebraranse na Coruña, na Facultade de Informática, a segunda edición das Xornadas sobre Seguridade, Defensa, Tecnoloxías Matemáticas e Computacionais, uns encontros que buscan xuntar canles e ligazóns entre tecnoloxía matemática e numérica e os ámbitos empresariais dirixidos á protección en calquera das súas moitas manifestacións (farase especial fincapé na protección da poboación ante desastres e ameazas de tipo natural). As xornadas abranguerán relatorios e unha mesa redonda na que se debaterá sobre o potencial da tecnoloxía matemática e numérica como ferramenta de innovación nos devanditos ámbitos. Detrás destes encontros atópanse entidades e centros tecnolóxicos como o CITIC, o CESEDEN, o ITMATI, a UDC e o Instituto Matemático Interdisciplinar (IMI) da UCM. Tamén se contará coa participación da Fundación Círculo, o INTA, e as empresas Inaer e Elinsa.
As xornadas darán comezo o luns 15 coa apertura oficial de actividades a cargo do vicerreitor de Investigación e Transferencia da Universidade da Coruña, Ricardo Cao. Tamén intervirá o delegado de Defensa na Coruña, José Abad Vilas, e o catedrático de Matemática Aplicada e investigador do CITIC, Carlos Vázquez, membro do comité organizador. A continuación, falará a profesora e investigadora Peregrina Quintela, directora do Instituto Tecnolóxico de Matemática Industrial, ITMATI. Tamén está previsto, xa pola tarde, que interveña Bertha Guijarro, vicecoordinadora e responsábel científico do CITIC, que falará sobre o labor do Centro de Investigación en Tecnoloxías da Información e as Comunicacións (CITIC) e os seus proxectos de transferencia de coñecemento e valoración de tecnoloxías.