O parque empresarial de Palas de Rei estrea accesos á Rede de até 350 Mbps

mércores, 24 de outubro do 2018 Redacción

A Xunta de Galicia e o operador R poñen en servizo o acceso a redes ultrarrápidas de ata 350 Mbps de velocidade no parque empresarial de Palas de Rei dende esta mesma semana, tal e como explicaron hoxe aos empresarios beneficiados o delegado territorial da Xunta en Lugo, José Manuel Balseiro, e responsables da AMTEGA e o operador R nunha xuntanza na que tamén participou o alcalde, Pablo Taboada.
Balseiro avanzou que está previsto que o servizo chegue tamén este mes a Monterroso e Guitiriz, sumando en total 14 polígonos, asegurando que o Plan de Banda Larga «permitirá que a final de ano o 85% da superficie empresarial ocupada da provincia conte con este tipo de cobertura». Tamén subliñou que o Goberno galego «pon á disposición das empresas chan industrial con modernas dotacións e servizos para incrementar a súa competitividade, incluídas as infraestruturas dixitais, que son hoxe en día ferramentas indispensables para o desenvolvemento de calquera proxecto empresarial».
As empresas dos polígonos beneficiados desta medida do Plan poden contratar servizos de Internet a través de fibra óptica cunhas velocidades de ata 350 Mbps de baixada e 35 de subida, e cunha garantía de caudal do 80% sen límite de descargas.
A Xunta subvenciona a través da AMTEGA estes despregamentos cunha axuda de 3,4 millóns de euros, que xerarán un investimento total de 5,2 millóns de euros. Estas subvencións cofináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR).

PUBLICIDADE