O luns conclúe o apagado analóxico das provincias da Coruña e Ourense

O vindeiro luns, día 1 de febreiro, logo do parón da fin de semana ao que nos teñen acostumados os responsables da implantación da TDT no noso país, vanse retomar os apagados analóxicos nas áreas técnicas de Ares, de Santiago e de Meda, facendo que se den por concluídas as fases I e II de implantación da TDT na nosa Comunidade, un proceso co que a Xunta leva un par de semanas traballando a reo para que ningún galego nin galega quede sen recibir o novo sinal dixital.
O luns tamén se incorporarán en exclusiva á TDT preto dun millón de persoas máis, e darase o apagado analóxico definitivo nas provincias da Coruña (excepto na zona do Barbanza) e de Ourense.
Deste xeito, o cese analóxico terá lugar nun total de 95 concellos destas dúas provincias, afectando, tamén, total ou parcialmente, a algún municipio da provincia de Lugo e da provincia de Pontevedra.
Os núcleos principais de poboación como a cidade da Coruña, Ferrol, Santiago, Ourense, Narón ou o municipio pontevedrés de Vilagarcía de Arousa tamén se incorporarán en exclusiva á TDT o vindeiro día 1, e os centros emisores do Pedroso (en Santiago), o de Meda (en Ourense) e o de Bailadora (en Ares) deixarán de emitir en analóxico definitivamente.
Estes ceses afectarán concretamente aos centros emisores de Ares, Arou, Cabanas, Cariño-Ortigueira, Cerdido, Doniños, Ortigueira, Penamoa, Vimianzo e Xaviña, pertencentes á área técnica de Ares; tamén aos centros de Catoira, Noia, Santiago-Pedroso, Santiago II e Vedra, da área técnica de Santiago; e aos centros de Almorfe, Arnoia, Avión, Chandrexa, Crecente, Leiro, Lobios (I e II), Meda, Nogueira de Ramuín, Ourense, Pantón, Pontedeva, Sobradelo e Xunqueira de Espadañedo, da área técnica de Meda. Ademais, da área técnica de Domaio (provincia de Pontevedra), apáganse os centros que afectan a Caldas de Reis, Catoira, Crecente, A Illa de Arousa, Vilagarcía de Arousa e Vilanova de Arousa.
Dos 95 concellos nos que se desenvolverá o apagado, 45 pertencen á provincia da Coruña (Ames, Ares, A Baña, Bergondo, Boimorto, Boqueixón, Brión, Cabanas, Camariñas, A Capela, Cariño, Cerdido, A Coruña, Dumbría, Fene, Ferrol, Frades, Mazaricos, Mesía, Miño, Mugardos, Narón, Neda, Negreira, Noia, Oleiros, Ordes, Oroso, Ortigueira, Outes, Padrón, O Pino, Rois, Sada, Santa Comba, Santiago de Compostela, Santiso, Sobrado, Toques, Tordoia, Trazo, Valdoviño, Vedra, Vilasantar e Vimianzo); 4 á provincia de Lugo (Carballedo, Pantón, Sober e O Vicedo); 40 á provincia de Ourense (Arnoia, Avión, Barbadás, Beade, Beariz, Boborás, Carballeda de Avia, Carballeda de Valdeorras, Cartelle, Castrelo de Miño, Castro Caldelas, Chandrexa de Queixa, Coles, Cortegada, Entrimo, Esgos, Gomesende, Leiro, Lobeira, Lobios, Melón, A Merca, Nogueira de Ramuín, Ourense, Paderne de Allariz, Padrenda, Parada de Sil, Pereiro de Aguiar, A Peroxa, A Pobra de Trives, Pontedeva, Quintela de Leirado, Ramirás, Ribadavia, Rubiá, San Cristovo das Viñas, San Xoán de Río, Taboadela, A Teixeira e Xunqueira de Espadañedo); e 6 á provincia de Pontevedra (Caldas de Reis, Catoira, Crecente, A Illa de Arousa, Vilagarcía de Arousa e Vilanova de Arousa).
Estes 95 concellos súmanse aos 108 nos que xa se produciu o apagado analóxico nas semanas anteriores o que suporá que a partir do luns 1.500.000 de persoas xa terán implantada en exclusiva a TDT.