O galego chega ao xogo Mezcladitos

Tras o éxito de Apalabrados, dende Etermax quixeron diversificar os seus xogos baseados na formación de palabras e estrearon un máis áxil Mezcladitos, consistente en paneis de 4x4 letras nas que buscar o meirande número de palabras posible unindo letras en vertical, horizontal e diagonal e partidas de 3 quendas de 2 minutos cada unha e coa posibilidade de facer uso de power-ups para engadir certa compoñente estratéxica aos desafíos entre xogadores. Este xogo, considerado como a revelación na App Store en 2012, está actualmente dispoñible para iOS, Android e Facebook, permitindo o xogo entre plataformas, o que é un dos seus grandes atractivos, e a semana pasada incorporou unha importante actualización na que engadiu a posibilidade de xogar contra opoñentes aleatorios (procurando que teñan un nivel de xogo semellante), un modo práctica (para poder xogar sen rival, para coller experiencia) e dous novos idiomas: noruegués e galego.
Para engadir o galego a Mezcladitos dende Etermax tiraron proveito do traballo da galega Cilenis, que xerou a listaxe de palabras en galego para o xogo Apalabrados, mellorando as posibilidade lúdicas da nosa lingua a través de aplicacións desta compañía que destaca pola súa sensibilidade á diversidade lingüística (facilitando que Mezcladitos estea dispoñible en español, francés, inglés, italiano, catalán, portugués, noruegués, éuscaro, holandés, alemán, inglés, sueco e galego).