Diego Giráldez acompaña o seu primeiro libro de relatos cun pioneiro booktrailer en realidade virtual
martes, 31 de maio do 2016
A
editorial Xerais vén de lanzar na Rede o que sería, nas súas
palabras, o
primeiro booktrailer
galego realizado en realidade virtual.
Trátase, máis polo miúdo, do adianto que serve de soporte de
mercadotecnia ao libro Galería
de saldos, do
escritor Diego Giráldez.
A
peza promocional foi dirixida por Antón Veiga e realizada por Mon
Moares. Segundo avanzan Xerais e máis o autor, grazas ao vídeo o
público poderá mergullarse nunha galería de arte virtual onde
visitar e descubrir as ilustracións que acompañan os diferentes
relatos do libro.
As
ilustracións veñen da man do deseñador Iago Sánchez Losada. A
portada, que tamén figura no booktrailer,
é obra do ilustrador Antonio Seijas. Como toda boa experiencia de
inmersión, a peza permítenos velo todo en 360 graos. “En
pantallas”, engádese, “o espectador poderá mover a visión co
rato ou empregando o dedo en soportes táctiles”. Porén, será nos
dispositivos intelixentes de “última xeración” onde o
booktrailer
dea o mellor de si. Por que? Pois porque posibilita a “inmersión
total” a través da tecnoloxía do headtracking
e os elementos de emprazamento espacial dos terminais. Segundo nos
conta a editorial, “a combinación con soportes que convertan os
teléfonos en cascos de realidade virtual é o último paso na
experiencia de visitar esta galería virtual”.
Galería
de saldos, editado por Xerais, é o primeiro traballo literario do
escritor e xornalista Diego Giráldez. O libro é unha escolma de
relatos curtos nos que “personaxes moi apegados a actualidade se
mesturan con obras de arte orixinais ou reproducións baratas”.
Estará nas librarías o vindeiro 9 de xuño.
O innovador booktrailer en 360 graos