O dispositivo vigués Safe Door, incluído entre os produtos TIC máis seguros de España
luns, 10 de xuño do 2019
As
tecnoloxías feitas na nosa terra seguen a colleitar éxitos aquí e
acolá. Por exemplo a tecnoloxía Safe
Door, un dispositivo desenvolvido en Vigo que vén de ser
catalogado entre os produtos TIC máis seguros de España. De feito,
foi quen de acadar a acreditación LINCE que outorga o Centro
Criptológico Nacional (CCN), o que supón a súa inclusión no
prestixioso catálogo CPSTIC. Trátase, máis en detalle, dun recurso
representativo do que se pode encadrar entre o máis avanzado do
ámbito actual da ciberseguridade. En termos concretos, protexe ás
organizacións dos tres tipo tipos de ataques que poden vir a través
das memorias USB: hardware (BadUSB), eléctrico (USBKiller)
e software (malware). Safe Door é unha tecnoloxía
desenvolvida pola empresa galega authUSB.
Por
certo que a devandita clasificación CPSTIC consiste nun catálogo de
produtos cualificados que cumpren os requisitos esixidos para o seu
emprego en sistemas afectados polo Esquema Nacional de Seguridade
tales como organismos públicos, infraestruturas críticas
(hospitais, aeroportos, infraestruturas enerxéticas e sector
industrial, entre outros), en calquera das súas categorías.
Safe
Door obtivo a clasificación alta para o Esquema Nacional de
Seguridade (ENS), que indica que é “un produto de total confianza”
e que “cumpre cos máximos estándares de seguridade e
cualificación”.
O
equipo de authUSB conformado por Estefanía Soto, directora executiva
(CEO); Jorge Vega, CTO; e María Cobas, directora comercial,
mostrouse moi satisfeito desta certificación: “O catálogo inclúe
21 empresas, e agás a nosa empresa, son todas grandes
multinacionais”, sinalan, engadindo que para authUSB é “un gran
logro e o resultado do esforzo de todo o equipo, estamos moi
orgullosos de que esta solución, desenvolvida integramente no seo da
nosa empresa, chegase até aquí”. Segundo opinan, “coa entrada
no catálogo vemos recompensado todo o esforzo e bríndanos grandes
oportunidades, así como posíbeis alianzas e sinerxías con socios e
integradores”, apunta Estefanía Soto.
Pola
súa banda, María Cobas pon o foco no candente ámbito da protección
dos datos: “As organizacións teñen que concienciar aos seus
equipos e pór medios para evitar riscos que poden derivar en perdas
económicas ou fugas de información; igual que non abrimos un correo
que non sexa de confianza, non debemos conectar directamente ao noso
equipo un dispositivo de almacenamento USB que nos atopemos ou que se
usou noutros computadores... O risco non merece a pena”.
Cobas
lembra que Safe Door é unha solución multiplataforma, que non
necesita instalación e que está indicada, entre outros, para
organismos públicos, infraestruturas críticas, sector industrial e
organizacións privadas.