O director de Plain Concepts fala este venres das moitas razóns para facérmonos empresarios TIC

Pablo Peláez, director de Plain Concepts

O director de Plain Concepts, Pablo Peláez, estará este venres 22 no centro CiTIUS, da Universidade de Santiago para falar da realidade do emprendemento “dende unha perspectiva práctica e desenfadada”, segundo informa a USC. A charla, nova sesión do laboratorio EmprendeLab, desenvólvese baixo un epígrafe que informa ás claras deste obxectivo creativo e orixinal da xornada: Mamá, quero ser emprendedor! Pero fillo, non será mellor ser funcionario?. Polo tanto, que ninguén se estrañe se se botan abaixo uns cantos tópicos sobre o que vén sendo o futuro profesional máis conveniente, cousa da que pais e nais gábanse de saber moito, para a nosa mocidade. Pablo Peláez asumirá este labor incorrecto lanzando unhas cantas mensaxes para os futuros empresarios TIC, que pode que non cheguen ao nivel de Mark Zuckerberg ou Bill Gates, pero terán algo en común con eles: “polo menos tentárono”.
Lembrar que Plain Concepts é unha compañía española con preto de 60 empregados, dispón de oficinas en Seattle, Madrid e Bilbao, e está especializada en áreas como tecnoloxías Microsoft, computación na nube (cloud computing), arquitectura software, consultoría, mecenado (mentoring) ou formación -entre outras. En palabras da USC, “a conferencia pretende formular con certas doses de humor o que realmente significa apostar polo emprendemento, desmontando os clixés asociados á figura do emprendedor que non adoitan corresponderse coa realidade; conceptos coma «diñeiro», «fama» ou «poder», darán lugar a outros máis realistas, como as dificultades cotiás ou o medo ao fracaso”.