O director da galega Alcatraz Solutions, recoñecido coa medalla de ouro do Foro Europa
mércores, 27 de febreiro do 2013
Leopoldo Mallo, socio e
director xeral de Alcatraz
Solutions, firma galega especializada en cumprimento normativo e
en protección do coñecemento (axudando ás empresas e organizacións
a respectar a Lei Orgánica de Protección de Datos, LOPD) vén de se
ser recoñecido coa prestixiosa medalla de ouro do Foro Europa.
Mallo, empresario galego amais de profesor na Universidade Autónoma
de Madrid, foi distinguido co devandito galardón debido á “súa
traxectoria profesional, humanista e europeizante”. Sinalar que
estas medallas, que entrega o Foro Europa dende 2002 a persoeiros
salientábeis nos eidos da política, a cultura ou a empresa,
diríxense a pór de manifesto os meirandes esforzos a prol da
construción dun novo tecido social e político que recolla e promova
os aspectos máis positivos do Vello Continente.
Entre outras
personalidades, xa son Premios Cidadán Europeo o xornalista Luis del
Olmo; a escritora Carmen Pousadas; o ex presidente do Círculo do
Liceo e do Círculo de Economía Carles Cuatrecasas; o políticos
Josep Piqué, Joan Clos, e Xavier Trías, e o presidente do Fútbol
Club Barcelona Joan Laporta. O recoñecemento ao galego Leopoldo
Mallo (A Coruña, 1965), licenciado en Ciencias Económicas e
Empresariais pola Universidade de Santiago de Compostela, pretende
“destacar unha traxectoria de máis de 20 anos de bagaxe
profesional”, informa Alcatraz, “durante os cales
desempeñou con éxito diversos postos directivos en empresas de
renome como Coca-Cola, Panda Software ou Iveco-Pegaso”.
Actualmente dirixe varias compañías TIC (Alcatraz e Global
E-Learning Services) e máis Rayle Investimentos.