O cineasta Dany Campos lanza un libro con formato tuit sobre a escritura de guións
mércores, 15 de maio do 2013
O cineasta e escritor
Dany Campos infórmanos
dun libro de seu, o primeiro que lanza desta temática, sobre a
arte e a ciencia de escribir guións para o audiovisual. Trátase
dunha obra filla do seu tempo, no senso máis tecnolóxico do termo:
concibiuse a través da actividade de comunicación que o autor
mantén a través da súa conta en Twitter (@consult_guion), dende
hai ano e medio, e isto déixase notar non só no texto que se ofrece
(que ten presente o xeito de traballar que permiten as redes sociais)
senón no seu propio formato e no estilo elixido para artellalo: coma
se dunha versión persoal do Twitter, dun usuario para toda a
comunidade, se tratara. Xa o título fala por si só: La
escritura de guión en 1000 tuits.
Unha
das conclusións que podemos
tirar é que redes como
Twitter estimulan un xeito de escribir que ten sombras pero tamén
luces: convídanos a que lle saquemos
punta ao maxín na procura
das palabras que digan máis con menos (nisto,
en definitiva, xa teñen traballado algúns dos mellores
representantes
da historia da literatura).
Xa centrándonos no miolo da obra, dicir que Campos ofrece un
repaso aos aspectos máis importantes do oficio de guionista, desde
como construír unha boa historia, pasando por consideracións
formais, até como vender o libreto ou frases de motivación que
acenderán o ánimo daqueles lectores interesados en escribir para o
cinema, a televisión ou os videoxogos. Como avanzamos, o contido da
obra está exposto “nesta popular versión do aforismo que é o
tuit”, sinala
Campos. É froito, polo tanto, da actividade do autor
compartindo os seus coñecementos cos seus seguidores a través desta
rede social, estimulando a creación de guións de ficción, así
como provocando o debate sobre distintos aspectos desta disciplina
artística. A obra, en opinión do autor, “non pretende ser unha
escolma académica de contidos sobre a escritura
de guión, senón unha boa chea de consellos e regras
que estimularán a creatividade e provocarán a reflexión do lector
para iluminarlle na escura tarefa de crear historias desde a páxina
en branco”.
Á parte do formato
físico da publicación, hai máis pegadas dos tempos tecnolóxicos
que corren. De feito, existen distintas versións electrónicas: para
eBook, para iPad e para calquera
outro dispositivo móbil ou tablet. A versión física, iso si,
xa está dispoñíbel en Amazon. Ademais, o proxecto comprende unha
“versión social” na que o contido do libro amósase de
maneira gratuíta a través da
propia web do libro. A peculiaridade desta versión, ademais da
súa gratuidade, é que os tuits son compartíbeis
a través das redes sociais do lector.
O libro tamén inclúe un
prólogo en formato tuit, no que 10 recoñecidos profesionais
da industria e a formación cinematográfica, así como algúns
representantes da comunicación dixital, escriben as súas impresións
sobre o libro co devandito formato. Entre eles atopamos a Julio
Alonso, gurú da comunicación en Internet, Pancho Casal, produtor de
contidos dixitais que atesoura 6 Goyas e 33 nomeamentos, Ginés
García Millán, recoñecido actor murciano, e Benito Zambrano,
guionista e director andaluz con 2 Goyas e 6 nomeamentos no seu
haber. Á vindeira presentación (20 de maio, na Librería Tipos
Infames de Madrid, ás 20 horas) tamén ten confirmada a súa
presenza o blogueiro galego Enrique Dans.