O detector de chuvia aceda das Aulas Tecnópole, segundo premio en Jóvenes Investigadores
martes, 7 de outubro do 2014
Os nosos novos
investigadores abeirados ás Aulas Tecnópole seguen a obter
importantes recoñecementos alá por onde van e presentan os seus
enxeños. Se
hai uns días falabamos en Código Cero dos recoñecementos obtidos
polo respaldo intelixente de Alba Fernández e Uxía García,
hoxe cómpre falar dunha nova distinción á tecnoloxía galega
xurdida do certame Jóvenes Investigadores 2014 que convoca o
Instituto da Xuventude do Goberno español. O enxeño galardoado
agora tamén é un vello coñecido de Código Cero, posto
que xa dimos conta del con motivo de ser declarado finalista do dito
concurso. Trátase dun sistema para a detección de chuvia aceda
en solos e plantas desenvolvido por tres alumnos das Aulas Tecnópole.
No
dito certame estatal gañou o segundo premio.
O proxecto, desenvolvido
por Queila Bouza, Miguel Gómez e Jorge Cordero, fora exposto o
pasado mes de maio na Intel International Sciencie and Engineering
Fair de Los Ángeles (EE.UU.), segundo lembra a Tecnópole “unha
das feiras máis grandes do mundo sobre traballos de ciencia e
tecnoloxía a nivel preuniversitario”. Entre os grandes puntos
fortes do enxeño desenvolvido por estes tres rapaces galegos atópase
o seguinte: que non só axuda a detectar os efectos da chuvia
contaminada senón que achega recursos para contrarrestar os seus
efectos. Ademais, apóiase directamente no emprego das novas
tecnoloxías, máis polo miúdo coa inclusión dun dispositivo
electrónico programado cun medidor de pH que posibilita aos usuarios
recibiren alertas nos seus dispositivos (móbil, tablet ou
computador) cando a tecnoloxía detecte chuvia cun pH inferior a 5,
ou sexa chuvia aceda.
O proxecto, que tamén
participara na última edición da Galiciencia, foi desenvolvido no
marco das Aulas Tecnópole, o programa de capacitación en
habilidades científicas e innovadoras organizado polo Parque
Tecnolóxico de Galicia coa colaboración da Consellería de Economía
e Industria.
Polo que respecta ao
certame Jóvenes Investigadores, sinalar que se celebra desde hai 27
anos e nesta convocatoria recente rexistrou o seu récord de
proxectos presentados, con 346 traballos de estudantes de entre 15 e
20 anos de toda España (sobre os 287 do ano 1997, a maior cifra
rexistrada ata agora na historia do concurso).