O buscador Atopo da Deputación de Pontevedra enriquécese cos fondos da Asociación da Prensa de Vigo
venres, 14 de xaneiro do 2022
Atopo,
o metabuscador de acceso libre e de balde da Deputación de
Pontevedra, comezou o ano con importantes incorporacións, no camiño
de achegar á cidadanía os fondos documentais e gráficos máis
completos posíbeis sobre a historia dos concellos da provincia.
Fíxoo coa
inclusión do material gráfico da Asociación da Prensa de Vigo,
grazas ao traballo realizado polo Servizo de Patrimonio Documental e
Bibliográfico provincial.
Segundo
lembra a entidade provincial, os fondos da asociación foron
depositados en 2006 no departamento provincial, dirixido pola
deputada María Ortega, e posteriormente organizados e ordenados.
“Quedaba pendente a catalogación do fondo gráfico, traballo que
se abordou e finalizou durante 2021”, engade a Deputación,
explicando que se trata de fotografías, diapositivas, tarxetas
postais e outros soportes, achegando 509 rexistros no metabuscador e
unha colección de material que “testemuña da vida política,
social, económica e cultural de Vigo e da provincia de Pontevedra na
segunda metade do século XX”.
Máis
de 300 desas imaxes levan o selo de Ángel Llanos, histórico
fotoxornalista vigués. O resto foron realizadas por outros
recoñecidos fotoxornalistas dos medios galegos como Magar, Cameselle
ou Rafa así como por fotógrafos da provincia (Terol, Pako, Manolo,
C. Gómez, Raimundo Cal, Ruiz, Siorty…) que traballaban como
colaboradores da prensa viguesa.
Como
curiosidade o fondo conta con cinco fotografías enmarcadas das
sucesivas xuntas directivas da Asociación entre 1942 e os anos 60
así como oito credenciais de diferentes reporteiros que traballaban
en diferentes lugares da provincia como colaboradores da Hoja del
Lunes.
Fundada
en 1809 e presidida inicialmente por Miguel Fernández de Lema, a
Asociación da Prensa de Vigo, unha das máis antigas do Estado, non
consolidou a súa importancia ata 1924, cunha directiva liderada por
Roberto Blanco Torres, e de xeito especial ata a aparición da Hoja
del Lunes, en 1936, constituída como medio informativo propio.