O Scratch Day do CPETIG convértese este sábado nun novo chamamento a prol da igualdade nas TIC
venres, 26 de maio do 2017
Este sábado 27 celébrase finalmente na
Cidade da Cultura de Santiago a
terceira edición do Scratch Day, un evento organizado polo
CPETIG e a axencia AMTEGA que ten o cometido fundamental de tirar
abaixo, dende a nenez, ideas preconcibidas de xénero sobre a
programación informática. Ou sexa, derrubar a falsa crenza de que
só os nenos están chamados a programar e construír, en definitiva,
o mundo dixital. Con este tipo iniciativas o Colexio Profesional de
Enxeñaría Técnica en Informática quere loitar de cheo contra os
problemas de desinformación que están a
provocar unha baixa presenza
feminina nas carreiras e ámbitos profesionais TIC. A respecto disto,
lembrar
que recentemente o CPETIG fixo un importante chamamento para inverter
a devandita situación.
Volvendo á previsión deste sábado, amais
dos ditos obxectivos específicos,
a organización do Scratch Day quere converter a Cidade da Cultura,
durante toda a xornada, no acubillo “dunha pequena lexión de
robotiños, programados por
escolares de 7 a 15 anos”. En
termos máis concretos, está confirmada a presenza de preto de cen
participantes, 30 delas/es escolares
e
outros 30 nais e pais das/os
menores, e os 30 restantes persoas interesadas en formarse para
ensinar programación á rapazada.
A sesión, que este ano chega á terceira
edición, responde tamén á
finalidade de difundir, “de
maneira
lúdica e divertida”, os valores da programación informática
entre os escolares, as familias e os
educadores,, “tomando
conciencia da potencia desta ferramenta como medio de expresión de
ideas e de creatividade”.
Respecto dos obxectivos de xénero, o
CPETIG lembra que o que se busca con esta actividade é
crear un escenario que “faga máis
libres aos estudantes á hora de elixir o seu futuro profesional”,
alleos a prexuízos
e convencionalismos. Para o colexio
que preside Marcos Mata, non hai dúbida acerca da efectividade
destas xornadas. De feito, se temos en conta o perfil dos
asistentes, a asistencia prevista pon de relevo que as nenas están
tan interesadas na programación de robots como os seus colegas
varóns, “sendo a participación practicamente
paritaria”.
O CPETIG desenvolve esta acción contando
co entorno familiar, por considerar “decisiva a implicación dos
pais e das nais nesta tarefa, como apoio e motivación para que os
seus fillos se sintan atraídos pola actividade, de xeito que esta
experiencia non sexa unha excepción, senón o principio dun labor
que poida seguir no fogar”.
A formación do III
Scratch Day será impartida por
Código Octopus, unha plataforma de recursos en galego ao servizo do
profesorado que desexe introducirse na programación con fins
didácticos.
10 anos de Scratch
O Scratch é unha ferramenta didáctica de
programación, lanzada hai agora 10 anos, que en
palabras do CPETIG “abre numerosas
posibilidades creativas como crear historias interactivas, xogos,
animacións ou programar robots”.
Ao longo desta década, o Scratch ten
revolucionado a aprendizaxe de escolares moi novos, con máis de 18
millóns de persoas usuarias en todo o mundo e máis de 22 millóns
de proxectos compartidos.