O Punto Limpo de Ames recolleu en decembro preto de tres toneladas de aparellos electrónicos e eléctricos
luns, 14 de xaneiro do 2019
O
Concello de Ames vén de facer balance da actividade do centro de
depósito de refugallos do Punto Limpo local, emprazado no polígono
de Milladoiro. Segundo fai saber o Goberno amense no seu reconto, o
centro rexistrou uns “magníficos datos que amosan a concienciación
da cidadanía co medio”. De feito, sinálase no informe, só no mes
de decembro o servizo foi empregado por case medio milleiro de
persoas.
Das contribucións feitas pola cidadanía, salienta o carrexado de
material electrónico e eléctrico (computadores, móbiles,
impresoras, pantallas, electrodomésticos de toda índole): 2.891
quilogramos de aparellos.
O
servizo, xestionado pola empresa Urbaser, tamén recolleu 100
quilogramos de envases baleiros contaminados e 950 quilos, que
corresponden a 118 unidades, de pneumáticos que se atopaban fóra de
uso. Asemade, tamén se entregaron 54 unidades de tubos fluorescentes
e outras lámpadas, 225 quilos correspondentes a 9 unidades de
baterías de chumbo, 300 pilas cun total de 9 quilogramos de pilas e
22 unidades de aerosois.
Segundo
lembra o Concello, o Punto Limpo está situado na rúa das Hedras do
polígono Novo Milladoiro e “ata alí poden achegarse todos os
veciños e veciñas de Ames para desfacerse de aqueles obxectos e
materiais que non van aos colectores convencionais de materiais
orgánicos, inorgánicos, vidro ou papel”. Asemade, ten especial
importancia o carrexado de material ligado aos electrodomésticos e
ás novas tecnoloxías, por ser aparellos moi suxeitos a unha
substitución continua nos nosos fogares e empresas e que, polo
tanto, ofrecen unhas necesidades especiais en materia de tratamento e
reciclaxe.