O Pont-Up Store regresa en setembro cun proceso extraordinario de presentación de candidaturas
luns, 21 de xuño do 2021
Volve
a Pont-Up Store, contra a
vento e marea, para facer de Pontevedra, novamente, a capital do
emprendemento emprendedor. A nova edición celebrarase en setembro,
os días 24 e 25, logo que se tivese que adiar nas datas previamente
fixadas por mor da pandemia de COVID.
Para
contrarrestar o problema do cambio de datas (e a imposibilidade de
acudir á feira, en setembro, de 8 dos 36 emprendementos que tiñan
previsto participar), o comité organizador decidiu abrir unha
convocatoria extraordinaria especialmente dirixida a “persoas
emprendedoras valentes que puxeron en marcha a súa empresa en plena
pandemia (entre 2019 e 2021) para cubrir esas 8 prazas”.
Este
novo proceso de recepción de candidaturas estará aberto entre o 28
de xuño e o 4 de xullo e tamén estará aberto a todos aqueles
proxectos que xa participaron en pasadas edicións do evento e que
presenten “unha innovación destacábel que lles permitira afrontar
con éxito a situación xerada pola COVID-19”.
Pedro
Figueroa, principal impulsor da feira e director da mesma, afirma que
“agardamos que o avance da vacina nos permita presentar o programa
en setembro e instalar os habituais expositores. En todo caso, xa
podemos adiantar que se van celebrar aquelas actividades que non foi
posíbel realizar o ano pasado en formato en liña, entre as que se
inclúen as de economía social, economía circular, rastrexos,
gaming, internacionalización…”.
Nova
plataforma dixital
O
director da feira engadiu que entre as principais novidades que trae
consigo este ano o evento empresarial Pont-Up Store (organizado polo
grupo de investigación G4 Plus co patrocinio da Concellería de
Promoción Económica, a Vicerreitoría da Universidade de Vigo e a
Deputación de Pontevedra) figura un “novo proxecto denominado
dixital_pontup, ao que o Concello de Pontevedra destinou unha achega
de 6.000 euros”.
Segundo
subliña Figueroa, “tras un ano tan complicado para os
emprendementos como foi 2020, estes novos tempos esixen repensar e
innovar para xerar dinámicas positivas que motiven e axuden a
visualizar ás novas persoas emprendedoras”, o que levou a poñer
en marcha “un espazo virtual interactivo, co deseño dun aplicativo
que permitirá a organización de diferentes eventos e actividades
vencelladas co novo emprendemento”. Así, a plataforma
dixital_pontup, en fase de desenvolvemento, fará posíbel “que
estas accións innovadoras e emprendedoras poidan ser visitadas non
só desde calquera lugar, senón tamén en calquera momento,
outorgando ademais unha maior proxección ás mesmas e un maior valor
engadido aos seus patrocinadores”, apunta Figueroa.
Pedro
Figueroa tamén quixo constatar que a nova plataforma permitirá,
entre outras cuestións, “contar cunha programación propia durante
todo o ano para a realización de foros, xuntanzas, intercambios de
experiencias ou actividades sectoriais adicadas ao novo
emprendemento; a integración no aplicativo dunha zona de exposicións
destinada a navegar por stands virtuais e interactivos que
conterán os proxectos de emprendemento seleccionados na edición (no
que se poderá visualizar unha recreación dixital en 3D da súa
tenda, contactar en tempo real por medio de videochamadas ou efectuar
compras); incrementar a visibilidade e difusión dos proxectos e os
patrocinadores en cada evento ou actividade; aumentar o impacto do
evento ou actividade explorando novas vías de difusión dixital, e
integrar no aplicativo unha zona virtual para presentar os
relatorios, mesas redondas e outras actividades grupais que acontezan
no evento ou ben aquelas que se poderían celebrar durante todo o ano
e dedicadas a sectores concretos (alimentación, tecnoloxía,
cultura, lecer…)”.