O Polo Aeroespacial contará cun parque industrial que dará acubillo a unha quincena de hangares
mércores, 16 de setembro do 2020
O
Polo Aeroespacial de Galicia, emprazado nas Rozas (Lugo), vai seguir
dando pasos para converterse definitivamente nun referente estatal e
europeo na creación de tecnoloxías ligadas aos vehículos aéreos
non tripulados. Así
o fixo saber este mércores o conselleiro de Economía, Francisco
Conde, quen visitou o complexo das Rozas para verificar as obras da
primeira fase da construción do parque tecnolóxico e industrial,
que alcanzará unha superficie de 31.000m² e terá capacidade para
acubillar unha quincena de hangares.
Acompañado
por representantes do Instituto de Técnica Aeroespacial (INTA), o
vicepresidente económico puido comprobar a marcha desta primeira
fase, na cal se está a traballar sobre unha área inicial de 3.000m²
onde a multinacional Babcock, con presenza no complexo galego, xa
está a piques de rematar a construción do seu hangar e Indra fará
outro.
Conde
salientou que estamos ante unha infraestrutura con “moito futuro
por diante porque o obxectivo é que este parque industrial conte
cunhas instalacións “únicas e pioneiras en España” que sirvan
“como base de operacións ás empresas dun sector con gran
potencial de crecemento como é o aeroespacial. Segundo dixo, contar
con máis e mellores infraestruturas fai do Polo Aeroespacial un
reclamo para atraer novos investimentos e fortalecer, así, o tecido
empresarial deste sector en Galicia.
O
vicepresidente económico salientou que o devandito é “xustamente
un dos retos para o vindeiro período 2021-2025” no que se prevé
un investimento público-privado de 160 millóns de euros para
reforzar as infraestruturas existentes, consolidar a
industrialización de equipos e sistemas, e avanzar na busca de
solucións tanto para o sector público como privado. Unha nova
andaina que “vai permitir que Galicia poida seguir na vangarda do
sector dos avións non tripulados no eido do coñecemento, da
investigación e, sobre todo, coas achegas da industria e coa
presenza de multinacionais como Indra, Boeing, Babcock e a través da
colaboración do Instituto de Técnica Aeroespacial (Inta)”.
Con
ese fin, a Xunta, a través da Axencia Galega de Innovación (GAIN),
lanzou o pasado mes de xuño unha consulta ao mercado para
identificar novas tecnoloxías e tendencias no sector e deseñar o
Polo Aeroespacial do 2025. Ao respecto, Conde apuntou que se
recibiron 153 manifestacións de interese (presentadas por 67
entidades diferentes) das que, máis da metade proceden doutras
comunidades autónomas e de empresas de países como Israel, EEUU,
Portugal, Suíza, Italia ou Holanda.