O Plan de Acción 2017 abrangue 40 programas TIC dotados con 83 millóns de euros
luns, 27 de marzo do 2017
Esta fin de semana a
Axencia para a Modernización Tecnolóxica de Galicia (AMTEGA)
achegounos máis detalles sobre o seu Plan de Acción 2017, co gallo
da súa aprobación. O Plan, como punta de lanza, abrangue 40
programas estratéxicos de actividade dotados con 83 millóns de
euros. Os obxectivos fundamentais destes programas son: consolidar
unha administración intelixente e eficiente, dixitalizar os sectores
económicos chave de Galicia, impulsar o sector TIC e estender redes
ultrarrápidas na Comunidade.
O Plan foi aprobado no
consello reitor da Axencia, presidido polo conselleiro de Facenda,
Valeriano Martínez. Na xuntanza do máximo órgano da AMTEGA, a súa
directora, Mar Pereira, debullou as iniciativas previstas para 2017,
salientando que “este será o ano no que se avanzarán nos desafíos
formulados na Axenda Dixital de Galicia, a estratexia tecnolóxica da
Comunidade para o horizonte 2020”.
Segundo fixo saber,
este ano avanzarase nas medias contempladas no Plan de Goberno e
Administración Dixital 2020 “co deseño e posta en marcha dunha
nova sede electrónica máis orientada ao cidadán, simplificada no
seu uso e con servizos máis personalizados”, ao que cómpre
engadir unha “ampliación das súas funcionalidades”. Neste
último senso, sinalou, habilitaranse recursos como a remisión
electrónica de documentación. O obxectivo é que as presentacións
na sede electrónica vaian alén das 100.000.
AMTEGA tamén informou
que, ao abeiro do Plan de Acción 2017, dixitalizaranse 173 oficinas
de rexistro, “o que permitirá a conversión do documento en papel
que entregan os cidadáns, en documento electrónico, e a súa
xestión integramente electrónica”.
Ademais,
medrarán até a cifra de 45 o número de certificados
dispoñíbeis na
plataforma de intermediación de datos e documentos PasaXe!, na
que, segundo informou AMTEGA,
en 2016 realizáronse máis de 2,6 millóns de consultas, prevendo
acadar este ano os 3 millóns.
No eido xudicial
integraranse novas funcionalidades do visor do Expediente Xudicial
Electrónico, que como lembraremos xa está accesíbel e operativo
para todos os órganos xudiciais, como avisos e alarmas. Asemade,
engadiu a axencia, “estenderase o uso da sinatura dixital no
funcionamento do órgano xudicial” e, por outra banda,
“incorporaranse novos colectivos, como forzas e corpos de
seguridade, sanidade pública e privada, ao emprego de LEXNET nas
súas comunicacións cos órganos xudiciais”. Polo que respecta á
rede de videconferencias, a intención é ampliala con novos
equipos, renovando preto de 1.000 postos de traballo tanto equipos de
sobremesa como equipos en mobilidade.
No eido turístico,
AMTEGA sinalou que impulsará o portal Turespazo para a relación co
sector turístico e fará avanzar, tamén, a coordinación con outras
administracións de fóra de Galicia “para a ampliación da
información relativa aos trazados do Camiño de Santiago fóra
da Comunidade autónoma”, informou.
Polo
que atinxe ao eido cultural, poranse en
marcha novas liñas de actuación vinculadas á Memoria Dixital de
Galicia, coa integración de novos fondos en Galiciana e a evolución
dos sistemas de catalogación de recursos de arquivos, bibliotecas e
museos.
No
plano
educativo,
en
palabras de AMTEGA,
“estenderase as aulas dixitais a todos
os centros educativos de Primaria, ESO e Bacharelato no marco do
proxecto Abalar e dotarase de redes de máis de 100Mbps a a 800
centros educativos públicos”. Tamén se fará fincapé nas
accións de formación e inclusión dixital para a cidadanía,
“ampliando en máis dun 100% a oferta formativa inicialmente
prevista na Rede CeMIT ata acadar as 250.000 horas de formación e os
65.000 usuarios”.
Polo
que atinxe aos servizos de Benestar, impulsarase, en
colaboración coa FEGAMP, o uso da Historia Social Única
Electrónica. Segundo lembrou AMTEGA, a esta Historia Social xa se
adheriron 70 concellos, aos municipios restantes mellorando
funcionalidades e procedementos e avanzarase no
modelo de Fogar Dixital.
No
sector primario,
a folla de ruta é traballar arreo nas
dúas liñas do Programa Primare. No sector agrario, a través do
desenvolvemento dunha plataforma de servizos servizos de valor
engadido tanto para os agricultores como para a administración a
través do uso de medios tecnolóxicos innovadores (drons, sensores,
sistemas de intelixencia de negocio, ...) en ámbitos como os
controis sobre o terreo, ou a evolución dos cultivos nas parcelas,
...; e no sector da pesca, cunha modernización dos procesos de
xestión e comercialización nas lonxas de Galicia.
Outro
dos retos para 2017 é ampliar a largo de banda da rede corporativa
da Xunta e, tamén, a dispoñíbel en xeral para toda a cidadanía
galega. “En 2017”, informou
a axencia que dirixe Mar Pereira,
“avanzarase na dotación de redes de ata 350 Mbps nos 81 polígonos
industriais previstos no Plan de Banda Larga 2020, unha actuación
que se completa cunha convocatoria de axudas para empresas e
autónomos das zonas máis illadas do rural xa publicada”.
No
que se refire ao pulo ao sector TIC, o roteiro é avanzar no
afianzamento do hipersector TIC. Para isto, impulsaranse e
desenvolveranse recursos como o Programa Transforma TIC para
desenvolver actuacións, en colaboración co sector empresarial,
universidades, centros tecnolóxicos, centros de investigación,
colexios profesionais e o propio sector TIC. Tamén se abrirán novas
convocatorias do Programa ReAcciona TIC, activado no 2016 en
colaboración co IGAPE, para fornecer ás PEME servizos de empresa
dixital e industria 4.0. Por outra banda, prolongaranse e
estenderanse iniciativas para “contribuír á aceleración da
innovación dixital en colaboración con axentes do sector TIC”,
como o centro de emprendemento Galicia Open Future, posto en marcha
en colaboración con Telefónica, ou o Connecting for Good Galicia,
impulsado xunto con Vodafone.
No ámbito das
infraestruturas de telecomunicacións, traballarase por “consolidar
o uso” da Rede Dixital de Emerxencias e Seguridade de Galicia, que
integra nun mesmo sistema a todos os colectivos que participan nas
emerxencias, mellorando a súa coordinación e garantindo as
comunicacións en situacións extremas ou de saturación. A este
respecto, cómpre lembrar que en 2016 fortalecéronse e optimizáronse
as infraestruturas de RESGAL, que ampliou o seu radio de acción en
máis de 145.000 hectáreas, o que lle permite, segundo lembrou
AMTEGA, abranguer 90% do territorio e o 96,5% da poboación.