O OnePlus One poderase mercar libremente durante un par de horas

luns, 19 de xaneiro do 2015 Marcus Fernández

Un dos smartphones máis buscados ultimamente é o OnePlus One, por ser un dos teléfonos máis potentes do mercado cun prezo asumible, xa que estamos ante un dispositivo que competiría directamente co iPhone 6 Plus, pero custando a terceira parte (os modelos de 16 e 64 GB de almacenamento teñen prezos de 269 e 299 euros, mentres que os equivalentes de Apple custarían 799 e 899 euros respectivamente). Pero estes smartphones chineses non teñen unhas vendas masivas por limitacións de produción, o que restrinxe as súas vendas a usuarios que conten cunha invitación, de aí que moitos interesados en adquirilo estean entusiasmados, xa que veñen de anunciar que mañá, entre as 20:00 e as 22:00 horas, van permitir a compra do OnePlus One sen invitación.
Lembremos que o OnePlus One é un smartphone 4G con pantalla Full HD de 5,5 polgadas, procesador Qualcomm Snapdragon 801 a 2,5 GHz, 3 GB de RAM, cámara traseira Sony EXMOR IMX214 de 13 Mpíxeles con dobre flash LED e gravación de vídeo 4K, cámara frontal de 5 Mpíxeles, Bluetooth 4.0, Wi-FI AC, NFC, batería de 3.100 mAh, 8,9 milímetros de grosor e 162 gramos de peso. Unhas prestacións de auténtico luxo que non ten competencia no seu rango de prezos.


Vídeo promocional do OnePlus One

PUBLICIDADE