O Observatorio da Cultura constata o impacto da tecnoloxía nos hábitos de consumo cultural
martes, 7 de febreiro do 2023
O
Observatorio
da Cultura Galega (Consello
da Cultura Galega) debulla
os datos sobre os principais hábitos de consumo para ver a súa
evolución nas últimas dúas décadas.
Comezando pola música, “o dato máis salientábel
é que a proporción de poboación en Galicia non asistira nunca ou
case nunca a un concerto reduciuse a dous terzos”. Tamén houbo un
incremento do 15,4 % no número de persoas que len, e a
asistencia a bibliotecas mantense nuns valores semellantes (o 16,4 %
da poboación acode polo menos unha vez ao ano), así como as
exposicións (20,2 %), museos (19,5 %) e arquivos (4,9 %).
Os
principais cambios nos nosos hábitos atópanse na asistencia ao
teatro e no modo de consumo audiovisual. No primeiro, o informe
conclúe que “hai unha clara redución na porcentaxe de persoas que
non acoden nunca ao teatro, que pasa dun 73,8 % a un 43,4 %”.
Con todo, o gran cambio está na asistencia ás salas de cinema,
debido á falta de interese e de tempo e o excesivo prezo da entrada.
Aínda que tamén descendeu o consumo de televisión e radio
convencional (un 9,5 % e un 4,8 %, respectivamente) e a
visualización de vídeos multiplicouse por catro.
O
informe establece que o confinamento foi un momento clave que
“incidiu de maneira importante na xestión do ocio no fogar”.
Así, un 56,6 % da poboación leu polo menos un libro e un 3,1 %
dos galegos e galegas subscribiuse por primeira vez a prensa dixital
de pago. Destaca o incremento do consumo de audiovisuais, sobre todo
de series e películas, que conseguiu que algúns galegos e galegas
se desen de alta por vez primeira en plataformas dixitais.
As
restricións tamén tiveron un certo efecto positivo nas visitas
virtuais a equipamentos culturais como museos, exposicións ou
galerías de arte. Ademais, unha pequena porcentaxe de poboación
incrementou o seu acceso ás bibliotecas dixitais (3,4 %) e
aumentou o consumo de concertos de música en liña (12,2 %).
No
informe destácanse indicadores dun comportamento cultural que
diferencia a Galicia de España: unha maior asistencia aos concertos
de música en vivo, os fogares teñen unha media de 20,4 libros máis,
e os índices de lectura de prensa e publicacións periódicas están
dez puntos por riba da media.
Nas
conclusións, o documento subliña dúas variábeis:
o incremento xeneralizado do nivel educativo da sociedade e o
condicionante familiar. “Aproximadamente un 62 % dos
proxenitores que len e un 54,9 % dos que visitan museos,
monumentos ou outros sitios de interese adoitan facelo cos seus
fillos”, asegura o informe.