O Museo Gaiás achégase ás aulas a través de visitas por vídeo-conferencia
xoves, 29 de outubro do 2020
O
Museo Centro Gaiás quere acurtar as distancias cos colexios a través
das novas ferramentas. Este xoves 29 presentou, de feito, un
programa pioneiro na nosa terra para a realización de visitas
didácticas por vídeo-conferencia. O obxectivo é achegar unha
alternativa segura ás saídas escolares en tempos de pandemia.
“Queremos
tirar proveito das tecnoloxías para permitir a docentes e alumnado
afondar en contidos culturais de primeira orde”, explica o Museo.
Grazas a esta iniciativa, máis de dous milleiros de estudantes da
ESO, en 62 quendas, afondarán na exposición que acolle estes días
o complexo expositivo da Cidade da Cultura: Galicia, de Nós a
nós.
Fontes
do museo recoñecen que o programa foi moi ben recibido pola
comunidade educativa, esgotándose en poucos días as 24 quendas
dispoñíbeis de aquí ao 15 de novembro, que “xa están todas
asignadas”. O Museo Centro Gaiás vén de abrir novas datas e a
partir deste venres os centros de ensino poden xa facer a súa
reserva para a segunda xeira de visitas didácticas. Nela atenderanse
outros 38 grupos entre o 17 de novembro e o 15 de xaneiro, esperando
superar os 2.000 estudantes a través deste proxecto pioneiro.
De
Nós a nós
Dirixidas
a alumnado de ESO e Bacharelato, as visitas en liña á mostra
Galicia, de Nós a nós permiten achegarse a distintas pezas e
relatos que se abordan na exposición, co obxectivo de destacar a
importancia da Xeración Nós na construción da identidade galega e
a súa pegada na nosa lingua e cultura. Están conducidas polo
persoal de guías do Museo Centro Gaiás, cos que alumnado e docentes
poden interactuar en directo.
A
visita emprega recursos audiovisuais adicionais que axudan a
comprender mellor o contexto sociohistórico e sociolingüístico da
Xeración e do Grupo Nós e a conectar os protagonistas da exposición
coa actualidade e coa realidade da audiencia. De xeito
complementario, a actividade proponse tamén pór en valor o uso das
TIC (Tecnoloxías da Información e a Comunicación) nos procesos de
aprendizaxe actuais.