O MacBook Pro de 13 polgadas renóvase dicindo adeus ao teclado de bolboreta

luns, 4 de maio do 2020 Marcus Fernández

O pasado novembro Apple renovou o seu MacBook Pro de maior tamaño, que agora pasaba a contar cunha pantalla de 16 polgadas e Magic Keyboard (dicindo adeus ao problemático teclado de bolboreta), e en marzo fixo o mesmo co MacBook Air, de xeito que no mercado quedaba un MacBook Pro con pantalla de 13 polgadas sen actualizar, situación que finalmente solucionan cunha renovación na que entra en xogo o Magic Keyboard, dóbrase a configuración de almacenamento en todas as configuracións estándar e incorpóranse procesadores Intel de 10ª xeración.
O novo MacBook Pro de 13 polgadas presume dun rendemento gráfico até un 80% máis rápido, até 32 GB de RAM, até 4 TB de almacenamento SSD cunha velocidade de até 3 GB/segundo, pantalla Retina con tecnoloxía True Tone, Magic Keyboard, Touch Bar, Touch ID e Thunderbolt 3 (con soporte para gráficas externas e monitores 6K) nun formato compacto e lixeiro (pesa menos de 1,4 quilogramos) e unha autonomía de até 10 horas de navegación web.
Este novo equipo está dispoñible por un prezo que parte dos 1.499 euros para unha configuración base cun procesador Intel Core i5 de 8ª xeración a 1,4 GHz, 8 GB de RAM e 256 GB de almacenamento SSD, mentres que a versión base máis completa contaría cun procesador Intel Core i5 de 10ª xeración a 2 GHz, 16 GB de RAM e 1 TB de SSD por 2.379 euros, configuración que pode mellorarse até un procesador Core i7, 32 GB de RAM e 4 TB de SSD, o que situaría o seu prezo en 4.379 euros.
Un dos detalles máis relevantes deste lanzamento é que supón a despedida definitiva do teclado de bolboreta nos equipos de Apple, desbotando unha tecnoloxía que tras 3 xeracións non conseguiu deixar de provocar fallos en numerosos equipos.

PUBLICIDADE