O LG Optimus L1 II venderase libre por só 89 euros

Aínda que LG queira despuntar no mercado dos smartphones de alta gama co seu LG G2, a compañía surcoreana non esquece a importancia da gama baixa, de aí que vaia pór á venda en España o LG Optimus L1 II a un prezo libre de só 89 euros, facendo especialmente asumible o gozar dun móbil con Android 4.1.2.
Este móbil de entrada está claro que non pode destacar polas súas prestacións polo seu prezo tan baixo, pero será máis que suficiente para usuarios que precisen do uso de aplicacións de mensaxería instantánea e manterse conectados á Rede, contando como principal limitación a súa pantalla de 3 polgadas cunha resolución de 240 x 320 píxeles. O LG Optimus L1 II funciona cun procesador Qualcomm Snapdragon MSM7225A a 1 GHz, 512 Mb de RAM, 4 Gb de almacenamento interno ampliable mediante tarxetas microSD de ata 32 Gb, cámaras de 2 e 0,3 Mpíxeles, Wi-Fi N, Bluetooth 3.0, GPS, receptor de radio FM (con función de gravación), batería de 1.540 mAh e un grosor de 12,2 milímetros. Venderase en branco e negro e, en vista do seu prezo, é de agardar que moitos operadores o incorporen ao seu catálogo para poder ofrecelo de balde para captar clientes.