O LG Optimus G Pro terá pantalla Full HD de 5 polgadas

martes, 22 de xaneiro do 2013 Marcus Fernández

Hoxe presentouse no Xapón o novo móbil LG Optimus G Pro, que no territorio nipón vai comercializar o operador NTT DoCoMo e que supón a estrea do fabricante surcoreano no que parece que vai ser a tendencia dos móbiles de alta gama durante a primeira metade do presente ano: a incorporación de pantalla Full HD de 5 polgadas.
O novo tabletófono de LG contará cun procesador Snapdragon S4 Pro a 1,7 GHz, 2 Gb de RAM, 32 Gb de almacenamento interno ampliable mediante tarxetas microSDXC, cámara de 13 Mpíxeles e LTE, incorporando polo momento como sistema operativo a versión 4.1 de Android.
O novo terminal móbil será moi semellante ao LG Optimus G, pero dun tamaño maior, o que supón un incremento do seu grosor en 1,5 milímetros e de 15 gramos de peso, aínda que como contrapartida a súa batería medra considerablemente (de 2.100 a 3.000 mAh).
Hoxe veu a luz este impresionante smartphone, pero non será ata o mes de abril cando comezará a venderse no Xapón, polo que non sería de estrañar que na mesma data tamén o puidésemos ver no resto do mundo.

O móbil chegará ao Xapón en 2 cores distintas

PUBLICIDADE