O Instituto Tecnolóxico de Galicia impulsa o primeiro voo de dron aerotaxi en España
martes, 4 de outubro do 2022
O
Instituto Tecnolóxico de Galicia representou nas instalacións do
Centro de Investigación Aeroportada (CIAR) en Rozas, Castro de Rei
(Lugo) o que sería o primeiro voo dun dron-aerotaxi en territorio
español. O aparello despegou equipado coa solución tecnolóxica de
xestión de tráfico aéreo urbano do ITG: a plataforma AIRUS,
destinada á integración eficiente e segura de drons en vilas e
cidades e froito da UMI (Unidade Mixta de Investigación) formada por
ITG e NTT DATA, co apoio da Xunta (Axencia Galega de Innovación,
GAIN). A demostración nas Rozas abeirouse ao proxecto europeo
AMU-LED, que busca avanzar na integración segura dos vehículos
aéreos non tripulados en contornas urbanas.
“Esta
integración”, sinala o ITG, “será clave para a democratización
dos servizos de mobilidade aérea urbana no futuro, xa que permitirá
habilitar aerovías urbanas baixo demanda e en tempo real”. O
instituto tamén explica que este software “incorpora os últimos
avances en enxeñaría de tráfico de drons para proporcionar
funcionalidades ao centro de xestión como a identificación e o
rexistro de drons, o xeoposicionamiento, a resolución de conflitos
de plans de voo, o seguimento e a monitoraxe do voo, a información
de tráfico, a interface con ATC (controlador tráfico aéreo), a
xestión de emerxencias, a información aeronáutica precisa, etc”.
Estes elementos dan como resultado “unha tecnoloxía con alto nivel
de intelixencia, seguridade, automatización e dixitalización,
elementos que permiten tráfico de drons en escenarios complexos,
onde a vixilancia é obrigatoria, por exemplo con voos que se
realizan máis aló do alcance visual do piloto, en contornas
aeroportuarias, en espazos aéreos de alta densidade de tráfico, en
áreas urbanas ou noutras infraestruturas críticas”, engaden o ITG
e NTT Data.
Respecto
do vehículo mostrado nas Rozas, tratouse dun dron EH216, en palabras
das dúas empresas devanditas o aparello AAV (siglas en inglés de
Vehículo Aéreo Autónomo) “máis avanzado do mundo”. Segundo
salientan o ITG e NTT Data, trátase dun trebello completamente
autónomo que pode transportar até 250 quilogramos, suficiente para
transportar dúas persoas ao longo de 35 quilogramos. A aeronave, que
pode alcanzar os 130 km/h de velocidade, é impulsada con enerxía
eléctrica que se recarga a través dunha fonte de alimentación de
220V ou 380V nunha hora como máximo. Xa ten acumulados 20.000 voos,
10.000 horas de viaxe e máis o transporte de 1.600 persoas, en doce
países. O seu fabricante, EHang, é un referente mundial en
tecnoloxía AAV e participa en números proxectos da UE para o
desenvolvemento da Mobilidade Aérea Urbana (UAM) con socios
tecnolóxicos europeos, como o ITG, entre outros. No transcurso das
probas que tiveron lugar en Rozas, o aerotaxi realizou 4 campañas de
voo, combinando tráfico de drons lixeiros simulado que permitiron
demostrar a capacidade do sistema AIRUS para reaccionar en tempo real
a diferentes continxencias, como desvíos do plan de voo, obstáculos
en pista e zonas restrinxidas no aire.