O Igape xestiona contactos entre empresas TIC galegas e israelís para favorecer oportunidades de negocio
luns, 11 de xuño do 2012
Durante o pasado mes de maio,
varias empresas galegas do sector das novas tecnoloxías, o téxtil ou a
construción, entre outros, tiveron a oportunidade de viaxar ata Israel para
encontrarse con empresas de cadanseus sectores nese país, e ter así a
posibilidade de poñer en marcha novos negocios e expandir as súas firmas alén
das nosas fronteiras.
Esta iniciativa, que levaba por
nome Maio de Galicia en Israel, foi
posible grazas á Consellaría de Economía e Industria, que a través do Instituto
Galego de Promoción Económica (Igape) xestionou os contactos no mercado israelí
para facilitarlle ás empresas participantes posibles oportunidades de negocio
ou alianza estratéxica nese país.
Máis polo miúdo, o Igape
achegoulles ás empresas galegas asistencia técnica previa e asistencia en
destino, e mantén arestora un labor de seguimento que ten como obxectivo
favorecer que os contactos establecidos “dean
froito e se reflicta na posta en marcha de novos negocios”, aseguran.
A actividade desenvolvida nas
feiras internacionais celebradas en Tel Aviv durante a visita en maio, permítelle
agora á Consellería de Economía e Industria establecer contacto con compañías
interesadas en avaliar posibilidades de investimento aquí en Galicia.
Ao mesmo tempo, o Instituto
traballa na busca de empresas galegas interesadas en facer negocios cos grupos
empresariais contactados polo Igape en Israel, en sectores como as TIC, o téxtil,
a fabricación de plásticos, a construción ou as conservas, entre outros.
Deste
xeito, a Consellería que dirixe Javier Guerra presta un servizo engadido de
seguimento que completa o traballo de apoio prestado ás empresas galegas que
participaron neste encontro, como Galchimia,
Telecon Galicia, Teaxul, Cultivos Casaíta ou UtilVigo.
Agora o punto de mira está na apertura de vías de
colaboración tanto institucional como empresarial con Israel, país que, segundo
informou Aguilera, “destaca polo seu
potencial innovador”.