O ITG xunta máis de 200 profesionais para o primeiro Industry Day galego

A nova sede nos Cantóns da Coruña do Instituto Tecnolóxico da Coruña (ITG) acolleu esta mañá o primeiro Industry Day de Galicia, un evento enmarcado na semana internacional EU Industry Week que impulsa a Comisión Europea co obxectivo de mostrar os desafíos industriais máis relevantes do momento. No acto, no que participaron máis de 200 profesionais, o conselleiro de Economía, Francisco Conde, lembrou a relevancia do espírito innovador, que no caso galego permitiu, dixo, “que esteamos á vangarda en sectores como o motor, os vehículos aéreos non tripulados, o naval, o TIC (Tecnoloxías da Información e a Comunicación) ou a biotecnoloxía”.
No acto tamén interveu o presidente de ITG, Antonio Couceiro, quen sinalou que “o evento de hoxe é reflexo da aposta do instituto polo desenvolvemento da I+D+i galega, un esforzo que fixo posíbel, xunto ao compromiso e a alta cualificación do equipo multidisciplinar que forma parte do ITG, que nos situemos en Europa, formando parte activa de proxectos innovadores nas áreas de I+D que máis percorrido teñen neste momento”.
Óscar Fafián, responsábel de Industria 4.0 e Internet das Cousas na operadora R, falou sobre “a necesidade das industrias de dotarse das tecnoloxías axeitadas para os procesos de transformación que xa se están experimentando”.
Pola súa banda, o director xeral da Cámara de Comercio da Coruña, Gonzalo Ortiz, expuxo os obxectivos da Oficina de Promoción Industrial local e a súa área de influencia, no marco do Plan de Promoción Industrial, que promove a entidade cameral.
Os contidos expostos nos dous bloques de relatorios da xornada viraron ao redor da transformación dixital e tecnoloxías facilitadoras na industria. Representantes de empresas de referencia expuxeron as súas experiencias nas áreas de control de procesos, mantemento preditivo, captura avanzada de datos, Big Data, Machine Learning, visión artificial, realidade aumentada e realidade virtual.
No primeiro bloque, Liderando a transformación dixital na industria, participaron representantes de Repsol, Navantia, o Clúster da Automoción de Galicia (CEAGA) e o Ilustre Colexio Oficial de Enxeñeiros Industriais de Galicia (ICOIIG). O relatorio de Accenture Strategy deu paso ao bloque Tecnoloxías facilitadoras, que contou coa participación de representantes de Álava Ingenieros, o Grupo ULMA, Material ConneXion Bilbao e a Asociación Española de Mantemento.
EU Industry WEEK
Entre xaneiro e marzo de 2019, están a celebrarse eventos locais e de portas abertas en toda Europa no marco da Semana da Industria da UE. As temáticas xiran arredor de desafíos industriais clave como a sustentabilidade, a dixitalización, o investimento e a globalización.