O Huawei Mate X verá a luz en setembro

Tras o Mobile World Congress de Barcelona confiábase en que 2019 fose o ano no que os fabricantes de smartphones competisen no lanzamento de dispositivos con 5G e con pantallas flexibles, pero os problemas previos ao lanzamento do Samsung Galaxy Fold e o veto dos EE.UU. a Huawei puxeron en dúbida que as pantallas flexibles fosen chegar pronto ao mercado de consumo.
Aínda que no caso de Huawei parecía que o seu Mate X non puidese concretarse por mor do bloqueo imposto polos EE.UU., dende a compañía saen agora a comentar que este produto é anterior á incorporación de Huawei á listaxe negra da Casa Branca, polo que non tería problema para incorporar Android e comercializarse con normalidade, e recoñecen que o adiamento no lanzamento do produto responde directamente aos problemas atopados por Samsung, ou sexa, que prefiren ser prudentes e someter o seu dispositivo a máis probas antes de ofrecer un produto que poida resultar problemático.
O Huawei Mate X estaba previsto que se vendese no mes de xuño a un prezo de 2.299 euros, e contando con conectividade 5G, polo que podería ser un produto moi interesante, especialmente neste momento no que están a estrearse as redes 5G en varios países europeos, pero dende Huawei aseguran ter adiado o lanzamento até o mes de setembro.
Pola banda de Samsung aseguran ter realizado varios cambios no Galaxy Fold e en poucas semanas anunciarán a data de lanzamento do seu prometedor smartphone encartable, que probablemente non chegue até despois do lanzamento do Galaxy Note10.